Требуется для просмотраFlash Player 9 или выше.

Статистика сайта

В. Вялюга.

Знак «Выдатнік адукацыі Рэспублікі Беларусь», званне заслужанай настаўніцы, прэмія Спецыяльнага фонду Прэзідэнта па сацыяльнай падтрымцы таленавітай моладзі, званне «Жанчына года-2006» Віцебскай вобласці – усім гэтым у розны час уганаравана лепяльчанка Валянціна Вялюга. А 3 лістапада Аляксандр Лукашэнка ўручыў Валянціне Васільеўне ордэн Францыска Скарыны. Такая ўзнагарода – прызнанне важкага ўкладу ў адукацыю, у тым ліку  падрыхтоўку пераможцаў і дыпламантаў алімпіяд самага высокага ўзроўню. Узяўшы на ўрачыстай цырымоніі слова, наша зямлячка сардэчна падзякавала кіраўніку дзяржавы, зазначыла, што на Лепельшчыне створаны спрыяльныя ўмовы для плённай працы педагогаў і вучобы дзяцей.

Выпускніца Віцебскага педінстытута, Валянціна Васільеўна выкладае хімію 32 гады, з іх большую частку – у лепельскай СШ №1. Менавіта з ёй звязаны галоўныя прафесійныя дасягненні настаўніцы. Усяго на асабістым педагагічным рахунку – 36 дыпламантаў абласных алімпіяд па хіміі, 8 з якіх вызначыліся і на рэспубліканскіх. У 2006 г. вучань Валянціны Васільеўны Аляксандр Маляўка атрымаў залаты медаль на міжнароднай Мендзялееўскай алімпіядзе ў Ерэване і сярэбраны – на сусветнай у Сеуле. Праз год у Мінску, ізноў на Мендзялееўскай, яшчэ адзін гадаванец лепельскай настаўніцы, Цімафей Балотнік, быў узнагароджаны сярэбраным медалём, а на міжнароднай у Маскве – бронзавым. Зараз хлопцы – студэнты хімфака Маскоўскага універсітэта. Яны не забываюць Валянціну Васільеўну – тэлефануюць, наведваюць падчас канікул. Зрэшты як і ўсе, на чый лёс паўплываў яе настаўніцкі і чалавечы аўтарытэт. Дырэктар СШ №1 Валянціна Хацкевіч жартуе, што педагог Вялюга – заснавальнік цэлай «хімічнай дыяспары», якая шмат дзе пусціла карані. У школе ж Валянціна Васільеўна – адзі­ная «хімічка». Гэта няпроста і адказна. Аднак для якога ліку выпускнікоў хімія стала вызначальнай пры выбары префесіі і колькі сённяшніх вучняў В. Вялюгі лічаць гэты прадмет любімым – проста не злічыць. Дарэчы, сын Юрый таксама ў свой час захапіўся хіміяй на маміных уроках і зараз працуе ў Інстытуце парашковай металургіі ў Мінску, а дачка Аксана пасля заканчэння Віцебскага медуніверсітэта (дзе ізноў жа хімія – прадмет нумар адзін) – афтальмолагам у Мурманску. Варта нагадаць і пра тое, што муж Валянціны Васільеўны – начальнік энергетычнай службы мясцовага жылкамгаса Уладзімір Вялюга, як і жонка, паважаны ў Лепелі і сёлета ўганараваны званнем «Чалавек года Віцебшчыны» ў сваёй прафесійнай намінацыі.
Кабінет хіміі лепельскай СШ №1 дзякуючы старанням настаўніцы В. Вялюгі – лепшы ў раёне, а сістэма яе працы з адоранымі дзецьмі, якая фундуецца на сучасных тэхналогіях, рэкамендавана для вывучэння па ўсёй вобласці. Калегі выбіралі Валянціну Васільеўну дэлегатам І і ІІ настаўніцкіх з’ездаў Беларусі. Яны шчыра ўзрадаваліся разам з вучнямі за яе і зараз. Пад апладысменты ў школе ёй уручылі кветкі і падарунак.
Кавалер ордэна Францыска Скарыны В. Вялюга, а такая ўзнагарода сярод настаўнікаў Віцебшчыны толькі другая па ліку, працягвае прымаць віншаванні. На пытанне карэспандэнта «НС», што яшчэ хочацца чалавеку, які дасягнуў такога прызнання, Валянціна Васільеўна адказала: каб шчаслівыя былі ўсе, з кім звёў лёс на працы і ў жыцці.

Галіна Шпакоўская, «НС». Фота Васіля Матыркі.