Требуется для просмотраFlash Player 9 или выше.

Статистика сайта

У абласной бібліятэцы імя Леніна адбылася прэзентацыя кнігі пісьменніка Сяргея Рублеўскага  «Ў», тое, што мы скарацілі».

Павіншаваць аўтара з чарговым здабыткам прыйшлі літаратары Уладзімір Папковіч, Давід Сімановіч, Франц Сіўко, Людміла Сіманёнак. Было багата чытачоў. Адна з прыхільніц, студэнтка эканамічнага факультэта Віцебскага тэхналагічнага універсітэта Наста Грышкевіч, нават прачытала верш С. Рублеўскага, прысвечаны бацькам – Васілю і Ірыне. Гэта стала сюрпрызам для пісьменніка, бо вершы ён пісаў ужо даўным-даўно.
Новая кніга С. Рублеўскага пачынаецца вось з такіх разважанняў пра самую адметную літару нашага алфавіту – «Ў», якая з’яўляецца адным з сімвалаў беларускага свету: «Гэта мяне ў Чарэйскай пачатковай школе вучылі, што наш алфавіт пачынаецца з літары «а». А калі я сам узяўся за розум і пачаў прымерваць на сваю душу абсягі беларускага свету, дык зразумеў, што – з літары «ў». З «у нескладовага». Ці «скарочанага», як кажуць такія, як і я, людзі з саматужнай філалагічнай дасведчанасцю...
«Ў» – наша радзімка, асаблівая прыкмецінка ў алфавіце, накшталт белага плямца на лабаціне рахманага бычка. Наш алфавіт у параўнанні з усходнім адпаведнікам большы на цэлую тыльду, якая ўзвышаецца, сукрысціцца, нібы спрытны чубок паміж рожак таго самага лабоні...
Калі адрэжам нажнічкамі часу чубок тыльдачкі пад упарта бадлівымі рожкамі, дык заадно, няўцямныя, перарэжам і сваю, такую неабходную, такую жыццядайную пупавіну, якая лучыць нас з Пачаткам Пачаткаў, з прыналежнасцю да існага...».
Гэта ўжо чацвёртая кніга пісьменніка. Раней былі «Апостраф», «Азярод», «Абмытыя валуны». Зараз пішацца пятая, у якой, спадзяемся, застанецца гэткая ж узрушанасць, як і ў папярэдніх. Праўда, Сяргей Рублеўскі прызнаўся, што быў найбольш шчаслівы, калі выдаў сваю першую кніжку. Пры выхадзе ў свет чарговых твораў падобнага пачуцца ўжо няма – гэта проста падзея. Тым не менш зычым Сяргею Васільевічу, каб такіх значных падзей было як мага болей.
І хай «Ў» будзе нескароным!

Сяргей Кавалеўскі, фота аўтара, «НС».