Традыцыйна напярэдадні светлага свята Божага Нараджэння ў віцебскай дыяцэзіі рымска-каталіцкага касцёла ў Беларусі прайшла сустрэча журналістаў з духавенствам.
Як заўсёды, да Калядаў прымеркаваны дні хрысціянскай культуры. Асноўныя іх мерапрыемствы адбудуцца ў катэдральным касцёле Езуса Міласэрнага. Гэта і ўсемагчымыя выставы, і канцэрты, і сустрэчы з творчай інтэлігенцыяй, і конкурсы батлеек. Кульмінацыяй стане вігілія ўрачыстасці Божага Нараджэння, якую ў ноч на 25 снежня ўзначаліць біскуп Уладзіслаў Блін. А ў пачатку студзеня ў Міёрах пройдзе 11-ы фестываль «Зорка Бэтлеема».
Ксёндз Віктар Місевіч пазнаёміў прысутных са свежым, ужо 9-м, нумарам газеты «Каталіцкі веснік», рэдактарам якой з’яўляецца і з якой актыўна супрацоўнічаюць і святары, і свецкія вернікі. Асаблівая ўвага была засяроджана на тым, каб каляднае свята было не толькі перагорнутым аркушыкам календара, а каб Хрыстос нарадзіўся ў гэтую чыстую ноч у сэрцы кожнага чалавека.
Біскуп Віцебскі Уладзіслаў Блін заклікаў суразмоўцаў вучыцца любіць сябе, «узняць крылы», не ўпадаць у роспач, бо Бог усіх любіць і нікога не абдзяляе сваёй увагай. Таму шчырая ўсмешка і добразычлівы погляд павінны стаць неабходнымі для кожнага хрысціяніна.
На пытанне аб будаўніцтве новых каталіцкіх святыняў ксёндз-біскуп перадусім адзначыў, што нарэшце накрыты дах велічнага старажытнага касцёла ў Дзісне, актыўна будуецца бажніца ў Бешанковічах. Не за гарамі асвячэнне віцебскіх касцёлаў Святога Духа на вул. Чкалава і Святога Антонія на вул. Гагарына.