Требуется для просмотраFlash Player 9 или выше.

Статистика сайта

Ідзе рамонт ГДК.

Другога верасня ў Глыбокім пройдзе Дзень беларускага пісьменства. Да свята засталося роўна 200 дзён. А колькі запланаванага яшчэ трэба зрабіць, каб у Год кнігі здзівіць гасцей не толькі абноўленым знешнім выглядам аб’ектаў прамысловай, сацыяльна-культурнай сферы горада, вёсак, аграгарадоў, але і перадаць любоў да друкаванага слова, пазнаёміць з мясцовымі звычаямі і традыцыямі!

Пазаўчора адбылося першае пашыранае пасяджэнне штаба па падрыхтоўцы да свята на чале са старшынёй аблвыканкама Аляксандрам Косінцам. За кароткі тэрмін, па словах Аляксандра Мікалаевіча, на глыбоцкай зямлі трэба навесці  ўзорны  парадак, зрабіць усё неабходнае, каб інфраструктура раёна адпавядала сучаснаму еўрапейскаму стандарту.

Правядзенне Дня пісьменства – даўняя мара многіх глыбачан. Мажліва, таму да свята рыхтавацца пачалі загадзя. Рэканструявалі сярэднюю школу №1, стаматала­гічную паліклініку, узвялі першую і другую чэргі гарадскога стадыёна, пабудавалі сучасную танцзалу... Сумеснымі намаганнямі абсталявалі дзіцячую пляцоўку на беразе возера Кагальнае. Аднак рэалізацыя іншых многіх цікавых ідэй і задум пакуль застаецца на паперы.

Напрыклад, па словах старшыні Глыбоцкага райвыканкама Алега Морхата, першага чэрвеня пасля капітальнага рамонту адчыніць дзверы ўтульны гарадскі Дом культуры, крыху пазней – дзіцячая школа мастацтваў, Дом рамёстваў. Да Дня беларускага пісьменства плануецца адкрыць у горадзе яшчэ адзін дзіцячы садок, завяршыць рэканструкцыю стадыёна.

Шмат пытанняў звязана з былым  памяшканнем раённай бібліятэкі, у якім пасля рэканструкцыі плануецца адкрыць філіял Глыбоцкага гісторыка-этнаграфічнага музея з заламі знакамітых землякоў.

Ёсць у Глыбокім тэатральная зала славутага земляка Ігната Буйніцкага, і, на думку А. Косінца, можна адкрыць і невялікі тэатр, дзе б самадзейнасцю займаліся дарослыя і дзеці.

 
Гасцям на Глыбоччыне павінна быць утульна, як дома. На пасяджэнні штаба абмяркоўваліся пытанні рэканструкцыі будынкаў гасцініцы, аўтастанцыі, чыгуначнага вакзала, размяшчэння ўздоўж буйных аўтадарог аб’ектаў прыдарожнага сэрвісу і г.д.

Да пачатку жніўня асноўныя работы трэба выканаць. Часу застаецца нямнога, тым больш што адны арганізацыі яшчэ не зрабілі праектна-каштарысную дакументацыю, другія чакаюць грошай.

– Не толькі горад, – зазначыў Аляксандр Мікалаевіч, – увесь раён павінен рыхтавацца да свята. Больш увагі трэба звярнуць на рэалізацыю праграмы «Чыстыя палі», на працу жыллёва-камунальнай гаспадаркі, рамонт сельскіх навучальных устаноў і г.д. Нельга спадзявацца толькі на бюджэт, трэба шукаць спонсараў, запрашаць да супрацоўніцтва замежных інвестараў.

Напрыклад, рамантаваць тэрапеўтычнае аддзяленне цэнтральнай раённай бальніцы дапамагаюць мясцовыя спонсары. А каплічку на месцы, дзе ў гады Вялікай Айчыннай вайны быў лагер смерці, пабудуюць за кошт ахвяраванняў вернікаў і правядзення ў раёне суботнікаў. Прыватнае прадпрыемства «Трэст­Прамбуд» на беразе возера Пліса будуе сучасны аздараўленча-турыстычны комплекс «Пліса». Яно ж дапаможа правесці рэканструкцыю мясцовай школы.

Дэталі сцэнарнага плана правядзення Дня беларускага пісьменства арганізатары распавядаць не спяшаюцца. Вядома, што галоўная святочная пляцоўка будзе размешчана на абноўленай цэнтральнай плошчы горада. Гараджане і госці свята змогуць зазірнуць на тэатральны панадворак, пазнаёміцца з самабытнымі майстрамі, гісторыяй краю, прыняць удзел у спартыўных мерапрыемствах і г.д. Глыбокае ўпрыгожыць Алея славы, будуць устаноўлены бюсты і барэльефы знакамітых землякоў.

Наступнае пасяджэнне арганізацыйнага штаба запланавана на 15 сакавіка.

Дзіяна Берніковіч, фота аўтара, «НС».