Требуется для просмотраFlash Player 9 или выше.

Статистика сайта

Калекцыю адзення «Вясенні бум-2013» прадстаўляе Шайцераўская СШ Верхнядзвінскага раёна.

Днямі абласны Палац дзяцей і моладзі прымаў гасцей з усёй вобласці – больш за 25 школьных калектываў сабраў чатырнаццаты фестываль «Экалогія. Прырода. Жыццё». Выступленні тэатраў мод, экатэатраў, агітбрыгад і фларыстычных тэатраў здзівілі членаў Журы творчым падыходам да пастаўленай задачы.

Па словах загадчыцы сектара прыроды і творчасці палаца Кацярыны Мацуганавай, мэта такіх мерапрыемстваў у павышэнні зацікаўленасці моладзі ў ахове навакольнага асяроддзя. І паколькі 2013 год абвешчаны Годам беражлівасці, некаторыя каманды прапаноўвалі свае спосабы энергазберажэння і эканоміі прыродных рэсурсаў.

З кожным годам узровень фестывалю расце: удзельнікі самі ствараюць сцэнарыі праектаў, сур’ёзна ставяцца да выступленняў. Таму і ацэньваць іх давялося па некалькіх крытэрыях: арыгінальнасць і пастаноўка праграмы, артыстызм удзельнікаў каманд, раскрыццё тэмы.

Канкурсанты расказалі аб праведзенай рабоце па ачыстцы тэрыторый ад смецця, аб прапагандзе энергазберажэння, аб азеляненні, у якіх яны штогод з задавальненнем удзельнічаюць. Школьнікі прызналіся, што агульнае імкненне да аховы навакольнага асяроддзя адкрыла ім шмат цікавага, а таксама прыбавіла сяброў.

Тэатры моды таксама прадэманстравалі плён сваёй працы. Разнастайнасць матэрыялаў (лён, пластык, цэлафан, папера, салома),  прымяненне розных тэхнік вырабу і пэўная тэматыка – усё гэта яшчэ раз даказала бязмежную фантазію педагогаў і вучняў.

Пераможцамі ў намінацыі «Агітбрыгада» сталі віцебскія сярэдняя школа №18 і гімназія №7, а таксама гімназія №2 Наваполацка. Лепшымі тэатрамі мод названы прадстаўнікі Браслава і Расон. Самыя адметныя фларыстычныя кампазіцыі прадставілі вучні Замастоцкай сярэдняй школы, падзяліўшы перамогу з аматарамі экалогіі з Цэнтра творчасці Віцебскага раёна. Лепшай тэатральнай кампазіцыяй названа выступленне экатэатра сярэдняй школы №2 Оршы.

Усе каманды ўзнагароджаны дыпломамі і прызамі. Кожны, акрамя падарункаў, атрымаў «бонус» – новых сяброў, добрыя ўражанні, стымул яшчэ актыўней працаваць дзеля роднай зямлі.

Анастасія Адамовіч. Фота Антона Сцепанішчава, «НС».