Требуется для просмотраFlash Player 9 или выше.

Статистика сайта

На гэтым фотаздымку мой прадзед па лініі маці – Фядот Трафімаў. На жаль, пра яго захавалася вельмі мала звестак. Аднак некаторыя дайшлі да мяне.

Прадзед нарадзіўся ў Гарадоцкім павеце Віцебскай губерні. У свой час служыў у царскай арміі, працаваў на чыгунцы. Яго дачка і мая бабуля – Марыя Фядотаўна Трафімава – расказвала, што ён быў вельмі добры і шчыры чалавек. Клапаціўся пра сваю сям’ю, любіў дзяцей, вёў гаспадарку. У 1931 годзе жыццё прадзеда трагічна абарвалася – ён трапіў пад цягнік. Фядот меўся паехаць у гарадоцкую бальніцу да сваіх дзяцей, якія хварэлі на тыф, але… Дакладна ніхто не ведаў, як гэта здарылася. Хутчэй за ўсё, па меркаванні маёй бабулі, прадзед задумаўся пра хворых дзяцей і не заўважыў цягніка. На той момант Марыі было дзевяць гадоў. Сям’я, у якой засталося пяцёра дзяцей, цяжка перажывала смерць бацькі. Гэта была вялікая страта!

Фотаздымак зроблены ў 1914 годзе. Памяць аб прадзедзе заўсёды будзе жыць у маім сэрцы дзякуючы гэтай фатаграфіі, якая захоўвае подых мінулага – гісторыю маіх продкаў.

Ад рэдакцыі. Шаноўныя чытачы! Пагартайце сямейныя альбомы, падзяліцеся ўспамінамі і ўражаннямі. Чакаем вашых допісаў па пошце альбо ў рэдакцыі (дасланае фота абавязкова вернем). Скарыстацца можна і электронным адрасам газеты (з адзнакай «Гісторыя ў фотаздымках»).

Юлія Залатая, студэнтка 5 курса гістарычнага факультэта ВДУ ім. П. М. Машэрава.