«У мінулым годзе Беларусь за валюту (з якой былі праблемы) купляла ў замежных краінах макулатуру для забеспячэння сыравінай прадпрыемстваў па вытворчасці паперы і кардону. Напярэдадні новага года ўрад давёў заданне па нарыхтоўцы макулатуры ўсім рэгіёнам, у тым ліку і Віцебскай вобласці, у аб’ёме 30 тыс. тон, што адпавядае трэці задання горада Мінска. Але ж у 2011 годзе не было нарыхтавана і гэтай колькасці макулатуры. Відавочна, каб выканаць заданне, трэба мець сістэмную арганізацыю збору папяровых адходаў, а не спадзяванне на «свядомасць» бамжоў і на эпізадычныя прымусовыя выпрошванні макулатуры вучнямі».
Такую заклапочанасць азначанай праблемай выказаў у сваім лісце ў рэдакцыю наш чытач, жыхар Сенненшчыны Уладзімір Дземчанка.
Разам з гэтай заўвагай Уладзімір Сцяпанавіч распавёў і пра сваё бачанне сістэмнай работы па нарыхтоўцы макулатуры. Акрамя індывідуальнай дабраахвотнай здачы насельніцтвам у нарыхтоўчыя пункты, на кожным прад-прыемстве і ў кожнай установе, дзе працоўны працэс прадугледжвае вялікую колькасць папяровых адходаў, павінен быць арганізаваны збор і кароткачасовае захоўванне макулатуры да прыёмкі яе нарыхтоўчай арганізацыяй.
Слушныя заўвагі па вельмі актуальнай праблеме. А што скажуць адказныя за гэту справу асобы?
Каментарыі па тэме
– Менавіта такі падыход мы і практыкуем, – пацвердзілі ў аддзеле другасных рэсурсаў аблспажыўсаюза. – Установам і прадпрыемствам Віцебска і раёнаў нават даводзяцца планы па здачы, і яны дамаўляюцца з нашымі рэгіянальнымі канторамі. Акрамя таго, вы самі ведаеце, што немалая доля ў справе збору макулатуры належыць насельніцтву, а дакладней, пэўнаму кантынгенту людзей. Хоць кошт складае толькі 250-300 рублёў за кг макулатуры, для некаторых і гэта грошы.
Таццяна Зуева, дырэктар Віцебскай гарадской нарыхтоўчай канторы:
– У мінулым годзе мы сабралі ад прадпрыемстваў 856 тон паперы, а ад насельніцтва – 1871. Чым гэта патлумачыць? Магчыма, асабістай зацікаўленасцю, бо насельніцтва здае нам макулатуру непасрэдна праз нарыхтоўчыя пункты (іх у Віцебску 8, яшчэ два новыя пакуль не адкрыты). Каля 250 дагавораў у нас было заключана з прадпрыемствамі. Бадай што для большасці з іх праблематычна вывозіць макулатуру рэгулярна, а ў нас толькі дзве машыны, якія задзейнічаны, калі забяспечана поўная загрузка (больш за тону). Натуральна, што падчас месячнікаў па нарыхтоўцы макулатуры ў школах мы забяспечваем транспарціроўку. Для многіх прадпрыемстваў таксама праблематычна і часовае захоўванне макулатуры, бо складзіраваць яе ў звычайных непрыстасаваных памяшканнях – парушэнне тэхнікі супрацьпажарнай бяспекі.
Аляксей Героеў, начальнік жыллёвага аддзела Віцебскага гарадскога прадпрыемства ЖКГ:
– У мінулым годзе нашыя даччыныя прадпрыемствы па горадзе (ЖРЭТы, дзве гасцініцы, «Гарсвет», «Гордармост», «Спецаўтабаза» і іншыя) выканалі даведзены план ў 300 тон. На гэты год ён павялічаны ўдвая. Забяспечыць такі аб’ём складана, тым больш, што ёсць праблема з абасобленым зборам другасных рэсурсаў. Кантэйнеры альбо пашкоджваюць, альбо крадуць. Нярэдка бамжы выцягваюць з іх адходы, якія могуць самі здаць у нарыхтоўчы пункт. Але мы не здаёмся. Сёлета будуць выдзелены сродкі на набыццё новых кантэйнераў (для пластыку – дакладна, для паперы і шкла – яшчэ пад пытаннем). Разлічваем і набыць транспарт, бо машын таксама не хапае, каб адвозіць нарыхтаваную сыравіну на спецаўтабазу. Там макулатура прэсуецца і вязецца на чашніцкую фабрыку альбо нашым транспартам, альбо іх (калі аб’ёмы вялікія). За збор непасрэдна па дварах адказваюць работнікі комплекснай уборкі, дворнікі, якія і самі па сваіх тэрыторыях збіраюць макулатуру, і любы жыхар можа да іх звярнуцца, каб здаць назапашаныя папяровыя адходы. Для іх часовага захоўвання перад транспарціроўкай у ЖЭУ прадугледжаны падсобныя памяшканні. Усё ў горадзе амаль так, як і прапаноўвае чытач з Сенненшчыны.