Гэтую мілавідную спадарыню ведае ў Гарадку, бадай, кожны жыхар. Без яе актыўнага ўдзелу не абыходзіцца ніводнае больш-менш сур’ёзнае культурнае мерапрыемства на раёне. Знаёмцеся: Алёна Пагіба – удзельніца народнага калектыва «Глейна», салістка ансамбля «Яблынька» Дома культуры і адначасова загадчыца аўтаклуба пры метадычным цэнтры Гарадоцкага райаддзела культуры. За прыгожы запамінальны голас аўтарытэтны штотыднёвік «Культура» назваў яе ні многа ні мала «мясцовай Мансэрат Кабалье».
А нарадзілася Алёна ў старажытным беларускім горадзе Слуцк. Неўзабаве бацьку-ваеннаслужачага перавялі ў Эстонію. Дваццаць гадоў, пражытых у Таліне, шмат у чым паўплывалі на фарміраванне светапогляду дзяўчыны. Тут яна скончыла музычна-педагагічную вучэльню, дзе атрымала дзве спецыяльнасці: выхавацеля і музычнага кіраўніка, працавала ў дзіцячым садку.
Потым лёс закінуў на іншы край свету, у далёкі Краснаярскі край. У Абакане таксама працавала па педагагічнай спецыяльнасці. Але абставіны склаліся так, што вярнулася на радзіму: у Гарадок, дзе раней аселі бацькі.
І вось ужо шосты год Алёна працуе ў мясцовай «культуры». Увесь яе імпэт накіраваны на тое, каб жыхары нават аддаленых вёсачак раёна не адчувалі сябе пазбаўленымі мастацкіх дабротаў цывілізацыі. Адзначаюць дзяржаўныя і народныя святы, ладзяць партрэтныя вечарыны, прысвечаныя нейкай знанай мясцовай асобе. Дарэчы, летась фальклорны гурт «Глейна» атрымаў званне народнага.
Графік выступленняў бывае вельмі насычаны: да двух канцэртаў на дзень. Акрамя таго, Алёна Пагіба спявае кожную суботу і нядзелю ў царкве, бо «душа патрабуе».
Падрастаюць у сям’і і двое дзетак. Пятнаццацігадовы Сяргей хоць і вучыўся ў музычнай школе па класе баяна, асаблівай любові да гэтага роду заняткаў не выяўляе. 16-гадовая ж Надзейка пайшла ў радзіцельку: спявае і ў школе, і ў тэхнікуме, выступала ўжо і на адной сцэне з мамай.
А яшчэ Алёна захапляецца класічнай музыкай. Падабаюцца творы Шапэна, Бетховена, Моцарта, Баха. Сучасная ж поп-культура водгуку ў яе сэрцы неяк не знаходзіць...

Алесь Бынькоў, фота аўтара, «НС»..