Гэтая сядзіба ў вёсцы Жданы Шаркаўшчынскага раёна вельмі прыкметная незалежна ад пары года. Нават калі ў халады знікнуць кветкі, што раскашуюць тут на кожным кроку. Звяртаюць увагу ўзорыстая агароджа двара, чысціня і парадак за ёй, фантан, утульная альтанка, побач мангал, іншыя самаробныя дэкаратыўна-побытавыя штуковіны. Вісяць, напрыклад, пад страхою ліхтары. З выгляду – «лятучая мыш», папулярная даэлектрычнай парой, з газавай запраўкай, кнотам. На самай справе яны сілкуюцца токам. Ля калодзежа – арыгінальная падстаўка пад вёдры. Знаёмыя рэчы ці іх часткі, здавалася б, аджыўшыя сваё і з пункту гледжання звычайных гаспадароў вартыя хіба што сметніка, тут спраўна служаць і ўпрыгожваюць двор. У кожным куточку яго можна ўбачыць нешта адметнае, незвычайнае – ля лазні, варыўні ці дрывотні, ля гаража.
Жывуць на выбітнай сядзібе механізатар сельгаспрадпрыемства «Васюкі» Барыс Андрэйчык, яго жонка Іна, даярка мясцовай малочнатаварнай фермы, і дзеці – школьніца Надзя і выхаванец садка Ілля. Да іхняга двара ўпрытык другі – Ініных бацькоў-пенсіянераў.
«Ня дзелімся, – так зазначыла Зінаіда Фёдараўна, у мінулым таксама калгасная даярка, – бо зяць дужа харошы». Шэсць гадоў нават жылі пад адным дахам. Потым маладыя атрымалі па дзедаўскай спадчыне асобную хату. Самі пашырылі яе, веранду прыбудавалі, абставілі мэбляй. Барыс на ўсе рукі майстар, начынне для кухні выштукаваў сам. Цешча хваліцца, што ён і торты ўмее пячы.
Наконт упрыгожання двара ў яго шмат задумак. У Казьянах бачыў мудрагелістую аздобу студні – вельмі хочацца падобную займець. Сямейнікі таксама ідэі падкідваюць. Па заказу малога Ілюшы пачаў рабіць казачную хатку на «курыных ножках».
– Раней такой моды не было, кветкі той-сёй садзіў, ды і ўсё. Ну, хату яшчэ шаляваную пафарбуюць. А цяпер гаспадары адзін перад адным стараюцца, хто прыгажэй двор зробіць, – кажа Зінаіда Фёдараўна.
Трэба дадаць, што на дзве сям’і ў іх тры гектары зямлі, тры каровы, трое быкоў, конь, свінні, куры, легкавік. Але ва ўсім парадак, бо калі Іна з Барысам на працы, за гаспадаркай прыглядзяць Зінаіда Фёдараўна з мужам Мікалаем Андрэевічам, колішнім механізатарам (як і ў маці з дачкою, так і ў цесця з зяцем – аднолькавая прафесія).
Дома мы заспелі толькі жаночую палавіну радні. Таму і сфатаграфавалі бабулю, дачку і ўнучку, а яшчэ куток прыгожай сядзібы, адзначанай у ліку дзевяці лепшых на раённым конкурсе па добраўпарадкаванню сярод маладых сем’яў.

Галіна Шпакоўская, фота Антона Сцепанішчава, «НС».