У Полацку прайшоў абласны этап рэспубліканскай алімпіяды па беларускай і замежных мовах. У час канікул юным інтэлектуалам Віцебшчыны давялося напружана працаваць, выконваючы складаныя заданні.
Багатымі людзьмі назвалі гэтых школьнікаў члены журы алімпіяды. Бо яны валодаюць тым духоўным скарбам, які ўзбагачае людзей, павышае іх культурны ўзровень, дае магчымасць больш поўна адчуць жыццё. Нельга па-сапраўднаму зразумець народ, не ведаючы яго мовы. Нездарма ў старажытнасці казалі: «Колькі моў ты ведаеш, столькі разоў ты чалавек».
Але найперш кожны  з нас павінен ведаць сваю родную мову – пачатак усіх пачаткаў. І алімпійцы выдатна прадэманстравалі гэтае веданне, нягледзячы на тое, што ім былі прапанаваны досыць складаныя заданні. Прадстаўнікі розных рэгіёнаў вобласці паказалі не толькі высокі ўзровень падрыхтоўкі, але і сваю адданасць беларускай справе. Як заўсёды моцна выступіла каманда Полацка: чацвёра з шасці яе ўдзельнікаў увайшлі ў склад пераможцаў. Прычым тры вучаніцы дзяржаўнай гімназіі №1 – Анастасія Качан, Вера Падасінавік і Вольга Аблажэвіч (на здымку) – узнагароджаны дыпломамі першай ступені.
– Мы вельмі ўдзячныя настаўніцы Алене Уладзіміраўне Казловай, якая пры­віла нам любоў да беларускага слова. Яна, як сонца, сагравае нашы душы, узмацняючы жаданне перамагаць, – узрушана дзялілася ўражаннямі Вольга Аблажэвіч.
Патрэбу размаўляць па-беларуску, мяркуе Вольга, трэба адчуць сэрцам і душой. Дзяўчаты ўпэўнены, што родную мову чакае выдатная будучыня, таму што ўсё больш моладзі цікавіцца сёння беларускай культурай, гісторыяй, жадаючы далучыцца да сваіх вытокаў.
Абсалютнай пераможцай алімпіяды па замежных мовах названа вучаніца віцебскай СШ №36 Кацярына Шаўчук, якая выканала заданні на 95,5%. А наогул дыпломы пераможцаў атрымаў 61 школьнік са 133 – кожны другі ўдзельнік. Прыемна, што пашырылася геаграфія знаўцаў замежных моў: сёлета сярод прызёраў ёсць прадстаўнікі не толькі Віцебска, але і Полацка, Оршы, Лепеля.
Зрэшты, для ўсіх алімпійцаў удзел у інтэлектуальных спаборніцтвах стаў вялікім набыткам, менавіта гэтыя хлопцы і дзяўчаты ў будучым змогуць прэтэндаваць на прыналежнасць да эліты грамадства.
На падвядзенні вынікаў начальнік аддзела ўпраўлення адукацыі аблвыканкама Васіль Горбаль шчыра падзякаваў палачан за гасцінны прыём і стварэнне выдатных умоў для працы і адпачынку ўдзельнікаў інтэлектуальных спаборніцтваў.

Ларыса Малашэня, «НС», фота Андрэя Марцінкевіча.