Требуется для просмотраFlash Player 9 или выше.

Статистика сайта

Умелая гаспадыня Т. Кучынская.

Ужо некалькі гадоў найбольш яркай падзеяй святкавання старога Новага года на Сенненшчыне з’яўляецца калядны канцэрт «Пажаданне на Ражаство».  У сёлетні арганізатары пастараліся дадаць пэўныя адметнасці.  Дзякуючы чаму мерапрыемства ператварылася ў сапраўдны калядны фэст.
Народныя гулянні разгарнуліся ў фае Дома культуры. «Ой, Калядачкі! Бліны-ладачкі!» Блінцы ладныя, блінцы смачныя (магу пацвердзіць!), а яшчэ мачанка, халадзец, яблыкі, капустка і шмат іншай смакаты  сустракалі сенненцаў. Гаспадыня і аўтарка каляднага стала Тамара Кучынская шчыра запрашала частавацца ласункамі і адначасова дзялілася цікавымі рэцэптамі.
Званочкі, распісныя талеркі, дошчачкі, збаночкі, вырабы з саломкі, гліны, дрэва размясціліся на стэндах раённага Дома рамёстваў. Прыгажосць купіць было нельга, а вось выйграць – калі ласка! Бяспройгрышная латарэя, арганізаваная народнымі ўмельцамі, разыходзілася сярод наведвальнікаў на «ўра».
Ганчарныя вырабы майстра з Багушэўска Уладзіміра Сінкевіча таксама карысталіся попытам. І хоць не ўсе змаглі адшукаць у сваім кашальку эквівалент 20 долараў (менавіта столькі каштавала гліняная ваза з вытанчаным арнаментам), многім па грашах былі маленькі збаночак ці смешная фігурка сімвала сёлетняга года – бычка.
Уладзімір Сінкевіч – вядомы ганчар на Віцебшчыне. Сёння ён вучыць круціць ганчарны круг маленькіх багушэўцаў у Доме творчасці дзяцей і моладзі гарадскога пасёлка.
Добра падсілкаваўшыся і патраціўшы ўсе грошы, можна і пра далейшы лёс падумаць. Ды і калі варажыць, як не на Калядкі! Варажбітка, а па сумяшчальніцтву кіраўнік народнага гурта «Вечарынка» Тамара Грыгаран вызначала лёс з дапамогай свечкі, ніткі, арэхаў, карт Таро. Асабіста мне наваражылі моцнага здароўя і багацця. Што ж, убачым праз год.
Шчадроўкі ў выкананні фальклорнага гурта Багданаўскага сельскага клуба «Згода» апавясцілі пра пачатак канцэрта. У старанавагодні вечар святочны настрой сенненцам падарылі  супрацоўнікі раённага Дома культуры, настаўнікі і навучэнцы Сенненскай дзіцячай школы мастацтваў з удзелам выхаванцаў нядзельнай школы пры Свята-Мікалаеўскай царкве.

Вольга Бандарэвіч, фота аўтара.