Требуется для просмотраFlash Player 9 или выше.

Статистика сайта

У Віцебску завяршыўся прадстаўнічы міжнародны турнір па футболе сярод жанчын. Арганізатарамі «Кубка СНД і краін Балтыі» сталі ўпраўленне фізічнай культуры, спорту і турызму аблвыканкама, асацыяцыя «Беларуская федэрацыя футбола» і яе абласное аддзяленне.

Кубак – у капітана расіянак.

На працягу тыдня моцныя каманды з Беларусі, Расіі, Літвы і Казахстана высвятлялі адносіны ў матчах па кругавой сістэме. У гэты аўторак адбыліся стыкавыя сустрэчы і ўшанаванне пераможцаў.
У гульні за трэцяе месца чэмпіён нашай краіны віцебскі «Універсітэт» з лікам 2:1 нанёс паражэнне казахскаму клубу «Жэрым-КУ». У фінальнай сустрэчы сышліся маскоўскі «ШВСМ-Ізмайлава» і маладзёжная зборная Беларусі (U-19). На жаль, сур’ёзнай барацьбы не атрымалася. Больш вопытныя масквічкі дамініравалі з першых хвілін, стварылі шмат небяспечных момантаў ля варот беларусак, два з якіх прывялі да галоў.
А пасля гульні адбылася цырымонія ўручэння ўзнагарод. Лепшымі ігракамі турніру былі прызнаны варатар Алена Кочнева і паўабаронца Алена Фаміна з Масквы, абаронца Ганна Грамалюк з віцебскага «Універсітэта» і нападаючы Анжэла Лапуста з беларускай маладзёжкі.
Каманды-пераможцы атрымалі памятныя прызы і медалі ад абласнога ўпраўлення фізічнай культуры, спорту і турызму, федэрацыі футбола, прадстаўніцтва алімпійскага камітэта, Віцебскага дзяржуніверсітэта.
Уручаючы кубак спартсменкам «ШВСМ-Ізмайлава», старшыня Беларускай федэрацыі футбола Генадзь Нявыглас падзякаваў усім дзяўчатам за прыгожую гульню ў няпростых умовах надвор’я, паабяцаў, што турнір стане штогадовым і ўжо ў 2010-м будзе праводзіцца пад дахам футбольнага манежа. Ён таксама выказаў спадзяванне, што да правядзення турніру далучацца выканаўчыя структуры СНД. Такім чынам, Віцебск неўзабаве можа стаць паўнапраўнай сталіцай жаночага футбола не толькі Беларусі, але і ўсёй постсавецкай прасторы.

Алесь Бынькоў, фота аўтара і АнтонаСцепанішчава, «НС».