«Хопіць сядзець на пенсіі!» – сказаў сабе аднойчы сенненец Андрэй Спаткай і падаўся ў малы бізнес. Пытанне, на чым зарабляць, невырашальным не сталася. Па адукацыі Андрэй Анатольевіч – інжынер, скончыў аўтатрактарны факультэт. Плюс 15 гадоў службы ў райаддзеле ДАІ і сур’ёзны вадзіцельскі стаж дакладна падказалі, чаго не хапае беларускім аўтааматарам. Фільтры для ачысткі паветра – дэталь аўтамабіля, якую замяняюць найбольш часта. Раней па іх даводзілася ездзіць у Расію. Гэтыя акалічнасці і сталі падставай для адкрыцця ўласнай вытворчасці гэтых самых фільтраў.
АТ «Элемент-Ф» працуе са снежня 2008 года. За такі кароткі перыяд яго прадукцыя паспела зарэкамендаваць сябе на беларускім рынку. Заключэнне дагавораў з аптавікамі працягваецца. Сенненскія фільтры разыходзяцца па аўтамагазінах Віцебска, Мінска і г.д. Планавалася экспартаваць тавар у Расію. Гэтаму пакуль перашкодзіў сусветны фінансавы крызіс. Аднак пераарыентацыя на ўнутраны рынак паспрыяла пашырэнню асартыменту выпускаемай прадукцыі. Сёння на прадпрыемстве з канвеера сыходзяць 7 відаў фільтраў для машын пераважна расійскіх і беларускіх марак: «Жыгулі», «Волга», «Масквіч», «Газель», для грузавых МАЗаў і КамАЗаў. У планах – выпуск фільтраў для айчынных трактароў. Па якасці яны не саступаюць расійскім, у нечым нават пераўзыходзяць. Фільтравальная папера нямецкай вытворчасці забяспечвае якасць еўрапейскіх стандартаў. «Ды і дызайн больш прывабны», – усміхаецца дырэктар.
У працы тут выключылі пасрэднікаў, перайшлі на спрошчаную сістэму падаткаабкладання і самі дыктуюць цану на рынку. Яшчэ адзін плюс малога прадпрыемства – магчымасць выпускаць тавар як тысячамі, так і адзінкамі. Свае працоўныя месцы ў ім знайшлі 5 чалавек – усе былыя супрацоўнікі Сенненскага РАУС, калегі Андрэя Анатольевіча. Пасля выхаду на заслужаны адпачынак працаздольныя мужчыны не сталі задавальняцца пенсіяй. Кожны з іх, уключаючы дырэктара, – універсальны супрацоўнік: і тэхнолаг, і рабочы, і грузчык. Пры расшырэнні вытворчасці работнікаў спатрэбіцца ў два разы больш. А гэта для Сянно нямала.
Андрэй Спаткай праводзіць па прадпрыемстве: сучасныя станкі з камп’ютарным кіраваннем, цалкам канвеерная вытворчасць. Магчымасці малога бізнесу ўражваюць – да дзесяці тысяч фільтраў у месяц. Усё размяшчаецца ў трох пакоях аднапавярховага будынка былога нарыхтоўчага пункта. Збудаванне, якое пуставала на працягу пяці гадоў, выкупілі, адрамантавалі. Дарэчы, зрабіць гэта аказалася лягчэй, чым зарэгістраваць сваю дзейнасць. Аднак былы міліцыянер адступаць не прывык. Ён упэўнены, што прадукцыя яго прадпрыемства зойме дастойную нішу.
– У нас сур’ёзная вытворчасць! – кажа прадпрымальнік.

Вольга Бандарэвіч, «НС».