АЗАА (Асіповічы) – «Лакаматыў-КіС» (Віцебск) – 111:92

Чэмпіянат краіны ў вышэйшай лізе распачаў сваю завяршальную фазу – серыю плэй-оф. У 1/4 фінала (тут сапернікі гуляюць да дзвюх перамог) віцебскаму «Лакаматыву-КіС» выпала сустрэцца з асіповіцкім АЗАА, адным з флагманаў айчыннага баскетбола. У мінулую суботу ў Асіповічах адбылася першая гульня.
Перапоўненыя трыбуны спартыўнага комплексу «Юнацтва», гучная падтрымка гледачоў, баскетбалісты-легіянеры, выступленні дзяўчат-танцорак у кожным перапынку, юныя збіральнікі аўтографаў – такое цяперашняму Віцебску можа толькі сніцца.
Тым не менш напачатку менавіта віцябляне задавалі тон сустрэчы. На чацвёртай хвіліне першай чвэрці яны вялі 12:7. Але больш вопытныя спартсмены з АЗАА пакрысе перахапілі ініцыятыву і завяршылі дзесяціхвілінку з лікам 33:19 на сваю карысць.
Нашы баскетбалісты не спынілі барацьбу і працягвалі ўпарта супраціўляцца больш вопытным гаспадарам. Напрыканцы першай паловы гульні яны скарацілі разрыў у ліку да дзесяці ачкоў – 50:60. Вострай была і трэцяя чвэрць, дзе спачатку АЗАА давёў сваю перавагу да 20 ачкоў, а потым «Лакаматыў-КіС» скараціў яе да 13-ці.
На апошнюю ж чвэрць віцяблян проста не хапіла. Баскетбалісты з Асіповічаў пры падтрымцы неўтаймоўных гледачоў спачатку давялі свой рахунак да трохзначнага, а потым – у канчатковым варыянце – зафіксавалі на табло такія прыемныя тры адзінкі.
Пасля гульні старшы трэнер «Лакаматыва-КіС» Руслан Байдакоў не хаваў свайго расчаравання ігракамі лаўкі запасных. Калі лідары каманды Ігар Канюшэнка і Сяргей Сапегін прынеслі ёй 28 і 20 ачкоў адпаведна, дык пяць іх аднаклубнікаў, што выходзілі на пляцоўку, ніводнага. А ўзяць лепшых не дазваляе фінансавае становішча клуба.
Па іроніі лёсу значны ўклад у перамогу АЗАА ўнеслі цэнтравыя – віцябляне Віктар Губко і Аляксей Федарчук, якія зараз выступаюць за больш багаты асіповіцкі клуб.
Але і ў цяперашнім складзе баскетбалісты «Лакаматыва-КіС», упэўнены, яшчэ здольны даць бой. Матч у адказ адбудзецца ў суботу а 15-й гадзіне на арэне Віцебскага ЦСК. Дык падтрымайма нашых хлопцаў!

Алесь Бынькоў, фота аўтара, «НС».