15 гадоў таму адбылося першае выступленне перад аматарамі паэзіі членаў шаркаўшчынскага літаб’яднання «Світанак». І з таго часу гэтая суполка, створаная пры рэдакцыі раённай газеты «Кліч Радзімы», жыве паўнавартасным творчым жыццём. Штоквартальна ў раёнцы выходзіць аднайменная літаратурная старонка, а колькі сустрэч адбылося з чытачамі ў мясцовых паэтаў – не злічыць.
«Світанак» аб’ядноўвае 15 чалавек рознага ўзросту і прафесій, шчыра закаханых у сваю Шаркаўшчыну. Двое з іх – члены Саюза пісьменнікаў Беларусі: загадчыца аддзела рэдакцыі, аўтар шэрага паэтычных зборнікаў, уладальнік «Бронзавага пяра» ўсебеларускага альманаха «Гоман» і кіраўнік аб’яднання Кацярына Сосна, а таксама начальнік райдзярж­тэхнагляду Міледзій Кукуць. Пенсіянерка Надзея Паляк, галоўны інжынер раёна электрасетак Віктар Лагун, выкладчык Германавіцкага аддзялення школы мастацтваў Таццяна Еўдакова і кіраўніца «Світанка» прыняты ў курскае літаб’яднанне «Славянские колокола» (Расія).
Нядаўна ў шаркаўшчынскім Доме культуры адбыліся творчыя імяніны паэтычнай суполкі. У іх удзельнічалі прадстаўнікі раённай улады, артысты мастацкай самадзейнасці, шматлікія аматары літаратурнай творчасці. Высветлілася, што шаркаўшчынскія паэты здольныя не толькі складаць вершы, бо падрыхтавалі да свайго свята яшчэ і выставу рукадзелля. Падчас імпрэзы была магчымасць азнаёміцца з радкамі сталых удзельнікаў «Світанка» і дэбютантаў – музычнага кіраўніка РДК Сяргея Кобелева і вучаніцы шаркаўшчынскай СШ №1 Святланы Клімзы.

Тамара Рыбакова, Шаркаўшчына.