Што можа аб’яднаць пісьменніка, батаніка, спявачку і генерала? У Полацку вырашылі, што сімвалам такой лучнасці стане алея землякоў, якая з’явіцца да дня нараджэння горада ў маі. Сімвалічная акцыя вяртання да сваіх каранёў бу­дзе адной з першых спраў нядаўна створанага ў Мінску Полацкага зямляцтва.
Старшынёй зямляцтва абраны галоўны дырэктар замежнага вяшчання Беларускага радыё паэт Навум Гальпяровіч, а яго намеснікамі – старшыня Полацкага гарсавета дэпутатаў Вольга Ждановіч і намеснік старшыні гарвыканкама Мікалай Ільюшонак.
Як праінфармаваў Н. Гальпяровіч, думка пра аб’яднанне палачан, што жывуць за межамі роднага горада, першапачаткова належала выкладчыцы Акадэміі кіравання пры Прэзідэнце Беларусі Веры Пазняк. Доўгі час ідэя, як кажуць, вісела ў паветры, а потым яе актыўна падхапіў старшыня Полацкага гарвыканкама Уладзімір Тачыла. У час сустрэч з Навумам Якаўлевічам яны і вырашылі рыхтаваць арганізацыйны сход.
Н. Гальпяровіч стаў ініцыятарам вечарыны, прысвечанай Году роднай зямлі і Полацку, што нядаўна прайшла ў сталі­чным Нацыянальным музеі гісторыі і культуры. Гэта была добрая нагода сабраць тых, хто нарадзіўся ці нейкі час жыў у самым старажытным горадзе краіны і мае да яго цёплыя пачуцці. Сярод іх было многа вядомых людзей.
Адным з першых на запрашэнне адгукнуўся дырэктар Батанічнага сада НАН Беларусі акадэмік Уладзімір Рашэтнікаў, які і прапанаваў прывезці для алеі землякоў розныя каштоўныя расліны. На вечарыну таксама прыйшлі міністр культуры Уладзімір Матвейчук, старшыня рэспубліканскага таварыства паляўнічых і рыбаловаў Іван Каросцік, дэпутат Палаты прадстаўнікоў Уладзімір Сінякоў, былы ваенны пракурор генерал-маёр юстыцыі Вячаслаў Любавіцкі, дырэктар выдавецтва «Пачатковая школа» Наталля Ваніна.
Шырокім фронтам заявіла пра сябе творчая інтэлігенцыя: літаратары Уладзімір Арлоў, Пятро Васючэнка, Генадзь Бураўкін, Алесь Савіцкі, Валянцін Лукша, мастакі Сяргей Цімохаў, Алег Ладзісаў, Нінель Шчасная, салістка ансамбля песні і танца Беларускай арміі Тамара Рэмез. А кампазітар Ізмаіл Капланаў спрычыніўся да Полацка праз творчасць паэткі Надзеі Салодкай, на вершы якой напісаў цудоўную песню «Горад над Дзвіной».
Што могуць зрабіць сябры Полацкага зямляцтва? Паў­дзельнічаць у абмеркаванні праблем, дапамагчы ў рэалізацыі самых разнастайных праектаў.
– Калі Скарына ганарыўся тым, што паходзіць са слаўнага Полацка, то і мы хочам прысвяціць свае справы роднаму гораду, падарыць яму тое, што зможам, – сказаў Навум Гальпяровіч.
Філіі зямляцтва плануецца стварыць у Маскве, Санкт-Пецярбургу і гарадах далёкага замежжа...

Ларыса Малашэня, «НС».