30 красавіка плошча Свабоды ў Віцебску, па сутнасці, адпавядала сваёй даўнішняй назве – Рынкавая. Тут праходзіла 15-я па ліку выстава-продаж прадукцыі навучальных устаноў вобласці – кірмаш «Вясновы карагод». Сёння ў заснаванай упраўленнем адукацыі аблвыканкама традыцыі ўжо ёсць паслядоўнікі – на Гродзеншчыне і Міншчыне.

Ілья Тарасенка з Віцебскага політэхнічнага ліцэя.

На гэты раз на плошчы ўмясцілася 110 гандлёвых «кропак». За прылаўкамі з прамысловымі таварамі, сельгаспрадукцыяй, кулінарнымі, сувенірнымі вырабамі шчыравалі навучэнцы і іх настаўнікі з прафтэхвучылішчаў, сярэдніх спецыяльных устаноў, школ, абласнога аб’яднання па арганізацыі пазашкольнай работы з дзецьмі і падлеткамі, а таксама студэнты двух віцебскіх універсітэтаў – тэхналагічнага і імя П. Машэрава. Цэны ў параўнанні з «дарослымі» кірмашамі былі ніжэй на 5-7%, а для ўдзельнікаў Вялікай Айчыннай вайны – на 30%. Ды гэта не адзіная прычына ўстойлівай папулярнасці мерапрыемства. Належная якасць рэчаў, экалагічна чыстыя прадукты і шырокі іх выбар год ад году вабяць сюды ўсё больш пакупнікоў. Набытым на кірмашы можна як след абсталяваць дачу, засеяць гарод, упрыгожыць жытло, адарыць сімпатычных табе людзей, смачна пачаставацца. Дадамо заўжды арыгінальны канцэрт маладзёжнай самадзейнасці – і стане зразумела, чаму кірмаш мае шмат верных прыхільнікаў.
Пра кожнага з удзельнікаў ёсць што добрае сказаць. На гэты раз была заўважнай пакупніцкая цікавасць да гародніны Віцебскага прафліцэя №3, юшкі і фігурнага печыва Відзаўскага прафліцэя, высокамастацкай керамікі Віцебскага тэхналагічнага каледжа. Густоўна выглядаў тэматычны кулінарны стол Віцебскага політэхнічнага ліцэя «Ганаруся табой, Беларусь», прысвечаны Году роднай зямлі (на здымку). Хатнюю жывёлу гадоўлі вучняў Обальскай СШ Шумілінскага раёна ахвотна бралі «на развод» жыхары прыватнага сектара. Мабыць, рэдка хто пайшоў адсюль з пустымі рукамі. Дарэчы, выручка папярэдняга «Восеньскага кірмашу» склала 125 мільёнаў рублёў.
Як паведаміў начальнік упраўлення адукацыі аблвыканкама Іван Шчурок, 30 мая ў Мінску плануецца аналагічная выстава-продаж, дзе абавязкова будуць прадстаўлены лепшыя вырабы юных майстроў Віцебшчыны.

Галіна Шпакоўская, фота Антона Сцепанішчава, «НС».