«Паломніцтва даверу» – так называецца міжнародная сустрэча моладзі, якая нядаўна адбылася ў Вільні. У ёй узялі ўдзел больш за 5 тысяч маладых людзей з усёй Еўропы, у тым ліку і з Беларусі (Віцебска, Мінска, Івянца, Гародні, Полацка, Глыбокага і інш.). Арганізатарам пілігрымкі ад нашай вобласці выступіла Віцебская дыяцэзія. А саму сустрэчу наладзіла экуменічная супольнасць Тэзэ, заснаваная ў 1940 годзе ў аднайменнай вёсачцы ў Бургундыі (Францыя). Яна аб’ядноўвае прадстаўнікоў розных хрысціянскіх канфесій: рыма- і грэка-каталікоў, праваслаўных і пратэстантаў.

Праграма «Паломніцтва даверу» складалася з супольных малітваў, семінараў, таксама заставаўся час для экскурсійных прагулак па горадзе і новых знаёмстваў.
Падчас вячэрняй супольнай малітвы касцёл святога Яна, які з’яўляецца часткай архітэктурнага ансамбля Віленскага універсітэта, і плошча перад ім цалкам запаўняліся паломнікамі, турыстамі і мясцовымі жыхарамі. І ўвесь гэты натоўп асвятляўся агенчыкамі свечак у руках вернікаў. Таксама было чытанне ўрыўкаў з Евангелля на розных мовах свету (у тым ліку і на беларускай) і вытанчаны цудоўны спеў шматтысячнага хору.
У першы і другі дзень сустрэчы праводзіліся семінары, прысвечаныя пытанням духоўнага жыцця чалавека, маральна-этычным і сацыяльным праблемам, такім як «Стварэнне сям’і ў сучасным свеце», «Біятэхналогія і чалавечая годнасць», «Мова сімвалаў праваслаўных ікон», «Працягні руку жабраку, і ён прывядзе цябе да Бога».
Падчас пілігрымкі маладыя віцябляне наведалі шмат цэркваў і цікавых мясцін Вільні, знайшлі новых сяброў, адчулі гасціннасць літоўскіх сем’яў, у якіх жылі, а галоўнае – умацаваліся ў хрысціянскай веры.

Ірына Лобан, магістрантка ВДУ імя П. М. Машэрава