«Тэмп» (Магілёў) – «Лакаматыў – КіС» (Віцебск) – 73:100, 79:89

Для таго, каб канчаткова захаваць прапіску ў вышэйшай лізе, віцебскім баскетбалістам трэба было дабіцца трох перамог у стыкавых гульнях з магілёўскім «Тэмпам». Пасля дзвюх віцебскіх сустрэч лік у серыі быў роўным – 1:1. Значыць, у гасцях трэба было двойчы перамагаць. І задача выканана!
Магіляўчане, разумеючы важнасць моманту, сабралі ўсіх мацнейшых баскетбалістаў абласнога цэнтра. І гэта напачатку дало плён. Першыя дзве дзесяціхвілінкі каманды ішлі ўпоравень, а ў трэцяй віцябляне выкарысталі сваю грозную зброю – актыўную зонную абарону. Гаспадары падселі і дазволілі «Лакаматыву» давесці свой ачковы баланс да трохзначнага.
Паўторная гульня прахо­дзіла прыкладна па такому ж сцэнарыю: першыя дзве чвэрці каманды трымаліся побач, а ў трэцяй нашы баскетбалісты, выкарыстоўваючы перавагу ў фізічнай падрыхтоўцы, зрабілі разрыў у ліку камфортным. Віцебскія трэнеры выпусцілі на пляцоўку рэзервовы склад, які здолеў давесці гульню да перамогі.
Цяпер у фінале за 5-6 месцы нашым сапернікам будзе БНТУ. Сезон амаль што скончаны. Асноўная выснова: ніжэйшая частка турнірнай табліцы – не месца для слаўнага сваёй гісторыяй віцебскага баскетбола. Трэнеры каманды лічаць, што калі б удалося вярнуць сюды хоць парачку «зорачак» сваёй гадоўлі, якія гуляюць у іншых клубах, – барацьба за вышэйшыя прыступкі турнірнай табліцы была б цалкам рэальнай. Але ўсё ўпіраецца ў фінансы...

Алесь Бынькоў, «НС».