21 мая заслужаная артыстка Беларусі, лаўрэат Дзяржаўнай прэміі БССР Валянціна Петрачкова святкуе свой юбілейны дзень нараджэння. У тэатры імя Якуба Коласа яна працуе з 1958 года пасля заканчэння студыі. Яе кіраўнік, народны артыст Беларусі Цімох Сяргейчык пакінуў запіс у вучэбным журнале: «З Петрачковай выйдзе адметная вострахарактарная актрыса. Яна зойме пачэснае месца ў коласаўскай трупе». І яго прадбачанне збылося!
Актрыса сыграла больш за дзвесце роляў на коласаўскай сцэне. Зараз Валянціна Петрачкова ператвараецца то ў знаходлівую няньку Феліцату («Праўда добра, а шчасце – лепш» А. Астроўскага), то ў заклапочаную смяшлівую маці Еўдакію Піліпаўну («За двума зайцамі» М. Старыцкага), то ў дух манастыра Урбэну («П’емонцкі звер» А. Курэйчыка), то ў бескарыслівую самаахвярную Памэлу («Дарагая Памэла Кронкі!» Д. Патрыка (на здымку).
Актрыса рыхтуе сюрпрыз для сваіх прыхільнікаў. Але гэта будзе крыху пазней, а сёння коласаўцы ад шчырага сэрца віншуюць Валянціну Цімафееўну з юбілеем, жадаюць ёй моцнага здароўя, асабістага шчасця, творчага натхнення і новых цудоўных роляў.
Некаторыя спецыяльна для чытачоў «НС» падзяліліся сваімі ўражаннямі ад творчасці актрысы, расказалі пра яе душэўныя якасці.
Ніна Левашова (Куляшова), актрыса:
– Чалавек вельмі апантаны ў рабоце. Кожны нават маленькі эпізод яна рабіла выразным і вясёлым. У Валянціны Петрачковай складаны лёс. Працавала прыбіральшчыцай у педагагічным інстытуце і адначасова вучылася ў студыі тэатра. Адна добра выгадавала таленавітага сына Васіля. На жаль, ён з сям’ёй жыве далёка, у Германіі, дома бывае вельмі рэдка. Гэта засмучае маці. Яна часам збярэ грошы і едзе адведаць сына і ўнукаў.
Валянціна – вясёлы па натуры чалавек, вельмі любіць людзей, дапамагае ім. Да яе заўсёды цягнулася моладзь. Яна завадатар тэатральных капуснікаў.
Валянцін Салаўёў, акцёр:
– Адметнасць Валянціны Цімафееўны распазнаецца па шчырасці ва ўсім: паводзінах у жыцці, стасунках з людзьмі, адносінах да прафесіі. Для яе тэатральная сцэна – месца споведзі. Сапраўдны талент, як правіла, не крыклівы, не «паказушны». Я вучуся ў яе глыбокай пранікнёнасці ў рабоце над вобразам і простай форме выяўлення.
Генадзь Гайдук, акцёр:
– Валянціна Петрачкова – не фанабэрыстая заслужаная артыстка, а ласкавая маці для моладзі, клапоціцца пра кожнага.

Святлана Дашкевіч,загадчыца літаратурнай часткі тэатра імя Якуба Коласа.