Помнік князю Андрэю Полацкаму.

Самы старажытны горад нашай краіны адсвяткаваў сваё 1147-годдзе, атрымаўшы да дня нараджэння шмат цудоўных падарункаў і прызнанняў у любові ад сваіх жыхароў.
Сёлетнія святкаванні былі прысвечаны Году роднай зямлі і 65-годдзю вызвалення Беларусі ад фашысцкіх захопнікаў, і гэта падкрэсліў велапрабег Полацк–Мінск з сімвалічнаю назваю «Агонь Перамогі». 28 мая на плошчы Свабоды палачане выправілі ў шлях дванаццаць вопытных спартсменаў – сяброў клуба аматараў веласпорту, якія выступілі ініцыятарамі беспрэцэдэнтнай акцыі. Пераадолеўшы 240 кіламетраў, веласіпедысты прыехалі ў сталіцу, усклалі кветкі да абеліска на плошчы Перамогі і запалілі факел ад Вечнага агню, каб потым прывезці яго дадому – да помніка Вызваліцелям Полацка.
30 мая ўдзельнікаў вела­прабегу на чале з дырэктарам ДЮСШ двойчы майстрам спорту СССР Леанідам Сіняўскім і майстрам спорту СССР Міхаілам Піскуновічам вітаў увесь Полацк. З акцыі «Агонь Перамогі» пачалося традыцыйнае ўрачыстае шэсце, прысвечанае Дню горада. Наперадзе святочнай калоны неслі сцяг Полацка, факел з агнём і сшытае актывістамі БРСМ «Палатно Перамогі», далей крочылі ветэраны Вялікай Айчыннай вайны, прадстаўнікі лепшых працоўных калектываў, моладзь. А разам з імі – госці з гарадоў-пабрацімаў Расіі, Украіны, Польшчы, Германіі, Латвіі, Швецыі. Па цэнтральным праспекце Полацка, якому нядаўна прысвоілі імя Францыска Скарыны, пад вітальныя воплескі жыхароў калона прайшла на плошчу Свабоды, дзе была ўсталявана галоўная сцэна свята.
Каб павіншаваць палачан, на яе ўзняліся старшыні гарвыканкама Уладзімір Тачыла, гарадскога Савета дэпутатаў Вольга Ждановіч, архі­епіскап Полацкі і Глыбоцкі Феадосій, член Савета Рэспублікі Валерый Рабец і дэпутат Палаты прадстаўнікоў Пётр Южык. Усе яны гаварылі аб выключнасці Полацка як першай сталіцы беларускай дзяржавы, духоўнага і культурнага цэнтра краіны, дзе жывуць сапраўдныя патрыёты сваей Радзімы, здольныя працаваць так, каб іх родны горад з кожным днём рабіўся ўсё больш утульным і прыгожым.
З заклікам і надалей не здаваць узятых пазіцый, імкнуцца да лідэрства, якое Полацку наканавана гісторыяй, да землякоў звярнуўся Уладзімір Тачыла. Ен абвясціў свята адкрытым. Сцяг Полацка паднялі дырэктар хлебазавода, занесенага на абласную і рэспубліканскую Дошкі гонару, Сяргей Лейчанка і пераможца рэспублі­канскай і міжнароднай алім­піяд па хіміі Дзмітрый Мярзлоў.
Па традыцыі мэр горада правеў цырымонію ўзнагароджання палачан за поспехі ў працоўнай і творчай дзейнасці і адзначыў, што з кожным годам такіх людзей становіцца ўсё больш.
І сапраўды, да кожнага дня нараджэння палачане рыхтуюць любімаму гораду ўсе больш прыемных падарункаў. Сёлета напярэдадні свята ў горадзе адкрыліся новая аптэка, кавярня і салон па продажы аўтамабіляў. Але адной з самых адметных падзей стала адкрыццё скульптуры ў гонар Андрэя Альгердавіча – апошняга з дынастыі полацкіх князёў, які пражыў жыццё сапраўднага ваяра і загінуў у баі з мячом у руках у 74-гадовым узросце. Паказальна, што ўзведзены помнік па ініцыятыве і за сродкі дырэктара прыватнага прадпрыемства «Полоцк­стройкровля» Аляксандра Лукашова, якому ўручана Ганаровая грамата гарвыканкама. Вобраз князя стварыў мінскі скульптар Ігар Голубеў, які нядаўна пераехаў жыць у Полацк, яму дапамагаў полацкі мастак Іван Іваноў, а адліта скульптура на полацкім заводзе «Тэхналіт», дзе пачалі асвойваць мастацкае ліццё.
Адчуць атмасферу старажытнасці прысутным дапамаглі ўдзельнікі народнага тэатра гістарычнага строю «Полацкі звяз», якія прадэманстравалі ўрывак са спектакля «Споведзь апошняга князя».
Яшчэ адной адметнасцю стаў удзел у свяце сяброў нядаўна створанага Полацкага зямляцтва, да якога належыць і дырэктар Нацыянальнага батанічнага сада акадэмік Уладзімір Рашэтнікаў. Ён падарыў роднаму гораду 40 дрэўцаў туі, што былі пасаджаны на цэнтральнай плошчы і стварылі алею землякоў. Дрэвы пусцяць карані ў зямлю, а вершалінамі ўзні­муцца да неба, злучаючы мінуўшчыну і будучыню старажытнага горада.
– Думкамі землякі заўсёды з Полацкам, бо ў гэтай зямлі – нашы вытокі, а цяпер тут будуць расці і нашыя дрэвы, – сказаў старшыня зямляцтва, галоўны дырэктар радыёстанцыі «Беларусь» паэт Навум Гальпяровіч. У сімвалічнай акцыі прынялі ўдзел і кіраўнікі горада.
У рамках акцыі «Землякі» ў музеі беларускага кніга­друкавання адкрылася кніжная выстава, а ў цэнтры рамёстваў і нацыянальнай культуры – пастаянная экспазіцыя твораў заслужанага дзеяча мастацтваў Рэспублікі Беларусь, ганаровай грамадзянкі Полацка мастачкі Нінэль Шчаснай.
Штогод да дня горада палачане рыхтуюць новыя маштабныя праекты. Сёлета такім стаў першы ў рэспублі­цы конкурс агнявых відовішчаў «Ноч агню». Лепшыя майстры гэтага жанру з Беларусі і Расіі падарылі гледачам незабыўнае феерычнае відовішча.
Не меншае захапленне жыхароў і гасцей горада выклікаў праект «Шэдэўры сусветнага мастацтва каля сцен старажытнай Сафіі», які трэці раз ажыццяўляўся пры падтрымцы Міністэрства культуры Беларусі і яго кіраўніка, таксама палачаніна, Уладзіміра Матвейчука.
Культурная праграма свята ўтрымлівала некалькі дзесяткаў разнастайных мера­прыемстваў. У сцэнічную пляцоўку ператварыўся ўвесь цэнтральны праспект, дзе дарылі сваё майстэрства гледачам лепшыя творчыя калектывы горада, выступалі паэты, працавалі мастакі, прадавалі свае вырабы майстры народнай творчасці. Усе ўрачыстасці праходзілі пад дэвізам «Полацк – лепшы на зямлі». Палачане не стамляліся прызнавацца ў любові свайму гораду, абяцалі і надалей берагчы яго святыні і памнажаць спадчынныя багацці.

Ларыса Малашэня, «НС». Фота Івана Дубоўскага.