У мінулую нядзелю Гарадок стаў сапраўднай культурнай сталіцай вобласці: тут ушаноўвалі двух знакамітых землякоў. У чэрвені споўнілася 175 гадоў з дня нараджэння аўтара сатырычнай паэмы «Тарас на Парнасе» Канстанціна Вераніцына, а сваё 70-годдзе ў родных мясцінах адзначыў Уладзімір Скарынкін, які здзейсніў сапраўдны творчы подвіг, пераклаўшы на беларускую мову «Боскую камедыю» Дантэ Аліг’еры.
На свята прыехала багата гасцей: паэтаў, музыкаў, навукоўцаў. Загадчык кафедры экалогіі і аховы прыроды Віцебскага дзяржуніверсітэта апантаны краязнаўца Анатоль Дарафееў распавёў пра ўраджэнца Гарадоччыны памешчыка Уладзіміра Карпава, які, з’яўляючыся прыхільнікам Льва Талстога, уводзіў у сваім маёнтку сучасныя метады гаспадарання, разнявольваў сялян. Паэт Уладзімір Папковіч прачытаў «Тараса на Парнасе» ва ўласным перакладзе на нямецкую мову.
А потым свае таленты прадэманстравалі музыкі. Яны прыехалі з усяго раёна на фінал фестывалю «Гарадоцкая скарбонка». Вайханы і Халамер’е, Езярышча і Обаль... Па адных назвах можна было вывучыць геаграфію рэгіёна. З Горак, дзе ў свой час вучыўся Канстанцін Вераніцын, да нас завітаў калектыў «Весялосць», а пад задорныя мелодыі народнага ансамбля «Полацкія россыпы» ногі самі прасіліся ў скокі.
Свята віравала не толькі ля сцэнічнай пляцоўкі. Непадалёк свае вырабы з саломкі, дрэва і воўны дэманстравалі народныя майстры. А вясёлая малеча скарысталася выпадкам пакаштаваць салодкай ваты, пакіраваць міні-аўтамабілем, пагушкацца на надзіманай горцы.

Алесь Бынькоў, фота аўтара, «НС».