Пераможцы – каманда віцебскага прадпрыемства «Элект».

Людзі, пазбаўленыя паўнавартаснага зроку, не павінны адчуваць сябе асобамі другога гатунку, а быць у самай гушчыні жыцця. Прыкладна так разважалі ў кіраўніцтве абласной арганізацыі Беларускага таварыства інвалідаў па зроку, калі пачалі арганізоўваць штогадовыя турыстычныя злёты. Іх геаграфія, згодна з задумкай старшыні арганізацыі Аляксандра Дубко, пастаянна мяняецца. Віцебскі раён, Браслаўшчына, Лепельшчына, цяпер вось гасцей прымала азёрная Ушаччына. Правядзенню мерапрыемства паспрыялі ўпраўленне фізічнай культуры, спорту і турызму аблвыканкама і ўлады Ушацкага раёна.
У спаборніцтвах прынялі ўдзел сем каманд: тры віцебскія, гарадоцкая, полацкая, лепельская і, натуральна, ушацкая. На жаль, па фінансавых прычынах на злёт не здолелі дабрацца інваліды з Аршаншчыны. Адкрываючы спартыўнае свята, намеснік старшыні райвыканкама Вольга Карчэўская падкрэсліла, што нездарма мерапрыемства, прысвечанае 65-годдзю вызвалення Беларусі, праводзіцца ў лічаных кіламетрах ад легендарнага «Прарыву», дзе лілася кроў абаронцаў Айчыны. Ушаччына – гэта край найпрыгажэйшых азёр і лясоў, радзіма Васі­ля Быкава, Петруся Броўкі, Еўдакіі Лось, Рыгора Барадуліна, шэрага іншых таленавітых паэтаў і празаікаў. Яна заўсёды гасцінная, гатовая падзяліцца сваёй прыгажосцю з усімі.
На працягу двух дзён на маляўнічых берагах возера Вечалле праходзілі спаборніцтвы ў розных дысцыплінах і конкурсах. А ў перапынках ля вогнішчаў гучалі шчырыя песні: балазе баянаў і гітар прывезлі з сабой даволі. Не прагадалі і тыя, хто абраў лясную цішу. Ім былі забяспечаны поўныя пасу­дзіны такіх карысных для аслабелага зроку чарніц. Блізкасць возера (дарэчы, Вечалле з 38 метрамі воднай тоўшчы ўваходзіць у дзесятку найглыбейшых у Беларусі) скарысталі аматары рыбнай лоўлі і купання.
Што датычыцца непасрэдных вынікаў спаборніцтваў, дык турысцкую паласу перашкод найлепш прайшла каманда віцебскага прадпрыемства «Элект». Яна ж перамагла ў агульнафізічнай падрыхтоўцы. Не дзіва: яе важак Юрый Ардынаў па сумяшчальніцтву капітан беларускай зборнай невідушчых футбалістаў. Лепшую эмблему стварылі мастакі з каманды абласной арганізацыі БелТІЗ. У разбіўцы бівака не было роўных гаспадарам на чале з вопытнай Тамарай Кляпец. А ў конкурсе мастацкай самадзейнасці журы пакарылі «камуфляжныя» артысты з віцебскага «Мега-В».
У агульным заліку перамог «Элект», а другое і трэцяе месцы падзялілі каманды Ушачаў і Лепеля. Што ж у плане здароўя – дык прайграўшых сярод тых, хто правёў гэты час на беразе Вечалля, відавочна не было.

Алесь Бынькоў, фота аўтара, «НС».