Упершыню ў гісторыі Віцебшчына прымала матч еўрапейскага футбольнага кубка.

Лік адкрыты!
У мінулы чацвер трыбуны Віцебскага ЦСК былі запоўнены амаль цалкам. Каля 8 тысяч чалавек прыйшлі падтрымаць наваполацкі «Нафтан», які ў кваліфікацыйным раундзе Лігі Еўропы прымаў бельгійскі «Гент».
Бельгійцы прыляцелі ў Віцебск напярэдадні чартэрным рэйсам, правялі трэніроўку і ўладкаваліся на базе адпачынку «Крупеніна». Здаецца, найбольшы галаўны боль у гасцей перад гульнёй выклікалі не тэхнічныя наваполацкія футбалісты, а якасць ежы і вады, таму з камандай прыляцеў кухар, які гатаваў для спартсменаў адмысловыя супы з агародніны. Новапалачанам наогул не знайшлося месца ў гасцініцах фестывальнага Віцебска і ў абласную сталіцу яны прыехалі толькі за паўтары гадзіны да гульні. Крыўдна.
Сустрэча пачалася з атак «Нафтана». Пры падтрымцы трыбун гаспадары адразу кінуліся наперад, чым вельмі здзівілі грознага саперніка. Самы рэальны момант меў паўабаронца Аляксандр Дзегцяроў, але пасля яго ўдару галавой мяч прайшоў міма варот. Пакрысе «Гент» выраўняў гульню і стаў часцей гасціць у штрафной навабранца новапалачан Эдуардаса Курскіса.
А ў сярэдзіне першага тайма адбыўся маленькі цуд. Дзегцяроў атрымаў мяч за межамі штрафной і першым жа крананнем адправіў яго ў сетку варот Бояна Ёргачэві­ча. Трыбуны трыумфавалі: да ўсяго іншага Аляксандр з’яўляецца выхаванцам віцебскіх трэнераў Валерыя Новікава і Аляксандра Асташэнкі.
Пасля гэтага ініцыятыва перайшла да «Гента». Бель­гійцы дамінавалі на ўсіх участках поля і некалькі разоў былі блізкія да мэты. Але ў адных выпадках добрую рэакцыю дэманстраваў Курскіс, у іншых мяч, нібы загавораны, не хацеў ляцець у вароты.
Не паспелі балельшчыкі адпачыць у перапынку пад спевы Ільі Смунёва і рок-гурта «Вакзал», як пачаўся другі раунд выпрабавання для нерваў. Ці здолеюць усё ж новапалачане захаваць пераможны лік?
Бельгійцы прагназуема кінуліся ў атаку. На 57-й хвіліне з межаў штрафной небяспечна б,е Мілаш Марыч, Курскіс адбівае і паўторным кідком накрывае мяч. Праз імгненне – чарговая хваля атак гасцей. Але контратака – і ўсё той жа Аляксандр Дзегцяроў з перадачы Дзмітрыя Камароўскага даводзіць лік да 2:0. На апошняй хвіліне гульні бельгійцы пасля розыгрышу штрафнога забілі адзін мяч у адказ.
Пасля сустрэчы я пацікавіўся думкамі наконт гульні ў аўтарытэтных асоб.
Ігар Кавалевіч, галоўны трэнер «Нафтана»:
– У цэлым першай гульнёй на міжнароднай арэне я задаволены. Канешне, крыўдна прапускаць на апошняй хвіліне, але ўсё вырашыцца 23 ліпеня ў паўторнай сустрэчы ў Бельгіі.
Мішэль Прудом, галоўны трэнер «Гента», лепшы варатар Еўропы 1994 года:
– Мы прапусцілі два галы, на якія не разлічвалі. Але вельмі ўжо прыгожа біў ваш Дзегцяроў. У нас было 4-5 добрых момантаў. Я рады, што ўдалося хоць часткова адыграцца.
Сяргей Місурагін, рэдактар тэлерадыёкампаніі «Віцебск»:
– Прыгожы, роўны футбол. Спачатку «Гент» гуляў «другім нумарам», а потым бельгійцы стварылі шэраг пагроз ля нашых варот.
Васіль Дзятлаў, ветэран віцебскага футбола, «містэр аўт»:
– Малайцы новапалачане: у першай жа міжнароднай гульні так сябе праявіць!
Аляксандр Дзегцяроў, аўтар двух забітых галоў:
– Вынік сустрэчы яшчэ нічога не кажа. На паўторную гульню будзем настройвацца па-баявому. Лічу, што мы павінны выйграваць...

Алесь Бынькоў, фота аўтара, «НС».