Требуется для просмотраFlash Player 9 или выше.

Статистика сайта

Жыхарка вёскі Зубава Аршанскага раёна Кацярына Фомчанка здавён мае хобі – збіраць артэфакты, якія сведчаць аб гісторыі і знакамітых людзях роднага краю. Да пенсіі яна працавала дырэктарам мясцовай школы і ўсяляк спрыяла папаўненню экспазіцыі тамтэйшага музея. Ды і пазней цікавасць да гісторыі не зменшылася. За некалькі гадоў назбіралася дастаткова экспанатаў, каб адкрыць у Зубаве яшчэ адзін музей.
Ініцыятыву К. Фомчанка падтрымалі старшыня Аршанскага райвыканкама Уладзімір Дзедушкін і старшыня СВК «Купалаўскі» Уладзімір Кавалёў. Апошні выдзеліў пакой у Доме механізатараў і ў лютым гэтага года на адкрыцці музея перарэзаў сімвалічную чырвоную стужку.
Экспазіцыя стваралася з дапамогай жыхароў навакольных вёсак. Сярод актыўных памочнікаў – старэйшына вёскі Лешча Аркадзь Пучкоў, Надзея Бярэзіна з Краснапольцаў (былая яе назва – Амерыка), Валянціна Лашчыноўская і многія іншыя. Тут сабраны матэрыялы па гісторыі сельгаспрадпрыемства, звесткі пра старшыняў калгаса. Не абмінулі ўвагай Янку Купалу, які меў дачу ў суседніх Ляўках, а таксама – Прэзідэнта Беларусі Аляксандра Лукашэнку, які нарадзіўся ў дзесяці кіламетрах адсюль. Дарэчы, нядаўна ў Копысі знайшлі самаробную хакейную клюшку (такімі вясковыя хлопцы ў 1960-1970-х гадах гулялі ў хакей). Тут мяркуюць, што гэтая клюшка магла належаць аднаму з сапернікаў, а можа і самому сённяшняму Прэзідэнту, бо яго вёска Александрыя знаходзіцца на супрацьлеглым беразе Дняпра, лёд якога зімой часта станавіўся хакейнай арэнай для копыскіх і александрыйскіх падлеткаў.
Музей можа наведаць кожны, хто цікавіцца гісторыяй гэтых мясцін. Тут нават завялі кнігу водгукаў, у якой мелі гонар зрабіць запіс і карэспандэнты «Народнага слова».
У ліпені ў клубе аграгарадка Зубава даваў канцэрт вядомы беларускі спявак Зміцер Вайцюшкевіч. Ён падзякаваў Кацярыне Паўлаўне, якая і сама прыхільная да песні, за зберажэнне гісторыі, падарыў свой плакат з аўтографам ды льняную сумку з надпісам «Будзьма беларусамі!», што таксама цяпер знаходзяцца ў музеі.
Тым часам колькасць экспанатаў большае і месца ўжо не хапае. Напрыклад, няма куды паставіць старажытную скрыню і шафу. У кіраўніцтва гаспадаркі Кацярына Фомчанка просіць яшчэ адзін пакой, каб зрабіць у ім інтэр’ер вясковай хаты канца ХIХ – пачатку ХХ стагоддзя.

Сяргей Кавалеўскі, «НС».