На вытворчым участку Глыбоцкага камбікормавага завода днямі сустрэлася з удзельнікамі жніва з СВК «Даватарскі» Шаркаўшчынскага раёна. Тут згружаў збожжа прыкамандзіраваны ў гаспадарку шафёр з наваполацкага завода «Палімір» Віктар Ганчарэнка. Прымаў ураджай вагаўшчык Дзмітрый Кавалёў, навучэнец Гарадоцкага аграрнага каледжа. Бацькі хлопца працуюць у «Даватарскім», вось і ён на летніх канікулах вырашыў падзарабіць. Якраз пад’ехала аўтамашына з абедамі. Марына Машнюк, навучэнка Полацкага аграрна-эканамічнага каледжа, якая ўвішна спраўлялася з палойнікам, зараз таксама на канікулах. Дзяўчына вучыцца за кошт гаспадаркі на аддзяленні праграмнага забеспячэння інфармацыйных тэхналогій, а зараз стараецца на раздачы абедаў механізатарам. Да 100 порцый у дзень трэба раскласці. На яе абслугоўванне не скардзяцца.
Шафёрам у Марыны яе бацька Міхаіл Аркадзьевіч. Ён пенсіянер, а ў мінулым быў перадавым камбайнерам гаспадаркі. Таму цяпер, прывозячы харч калегам, у кароткія хвіліны перапынку звыкла дзеліцца вопытам з маладымі хлебаробамі.
Сельгаскааператыў «Даватарскі» – адзін з буйных у Шаркаўшчынскім раёне. З году ў год тут атрымліваюць неблагія намалоты збажыны, дае прыбытак жывёлагадоўля. Вось і сёлета самая высокая па мясцовых мерках ураджайнасць – 45 цэнтнераў з гектара. Да перапрацоўкі ўраджаю падрыхтаваліся загадзя – зманціравана зернесушылка тыпу КЗСВ-ЗО. За суткі тут даводзіцца да ладу 200-250 тон збожжа. Яно рэалізуецца дзяржаве, напаўняюцца і засекі гаспадаркі.

Кацярына Сосна, фота аўтара.