Учора ў Бягомлі Докшыцкага раёна адбыўся ўрачысты мітынг з нагоды ўручэння дзяржаўнага вымпела «За мужнасць і стойкасць у гады Вялікай Айчыннай вайны». Прадстаўнікі ўлады, жыхары пасёлка і госці збіраліся ля ўстаноўленага паблізу шашы Віцебск-Мінск «Ил-12», прататыпа самалёта «Дуглас», які прылятаў на партызанскі аэрадром у Бягомлі падчас барацьбы з акупантамі.
Ганаровую ўзнагароду з рук намесніка старшыні аблвыканкама Алега Мацкевіча прыняў старшыня Бягомльскага пассавета Валерый Міхайлоўскі. Апроч іх на мітынгу выступілі старшыня Докшыцкага райвыканкама Алег Пінчук, удзельнік Вялі­кай Айчыннай Валянцін Якушэўскі, выкладчыца Бягомльскай школы мастацтваў Алена Сідаронак, дачка колішняга камісара партызанскай брыгады «Жалязняк» Сцяпана Манковіча – Ніна Сычова. Гучалі словы ўдзячнасці за ўзнагароду ў адрас Прэзідэнта Беларусі Аляксандра Лукашэнкі, згадваліся гераічныя старонкі мясцовай гісторыі змагання супраць фашыстаў.
У снежні 1942 г. з Бягомля немцаў выгналі партызаны. Фактычна да прыходу Чырвонай Арміі гарпасёлак быў цэнтрам Бягомльска-Барысаўскай партызанскай зоны з тэрыторыяй у дзве тысячы квадратных кіламетраў, 40 тысячамі насельніцтва. Тройчы гітлераўцы прадпрымалі карныя аперацыі супраць гэтай выспы свабоды, але намаганнямі народных мсціўцаў савецкая ўлада сюды вярталася зноў і зноў.
Сёння Бягомль набірае моцы і прыгажэе дзякуючы рэспубліканскай праграме развіцця малых гарадоў. Узнагарода, як адзначалася на мітынгу, натхніць бягомльцаў на новыя добрыя справы.
Вымпел будзе змешчаны ў экспазіцыі мясцовага музея народнай славы і надалей стане галоўным сімвалам урачыстасцей у Бягомлі.

Галіна Шпакоўская, «НС».