У Смаргоні на Гродзеншчыне прайшоў Дзень беларускага пісьменства. У свяце прымала ўдзел і дэлегацыя Віцебшчыны.
Па словах начальніка ўпраўлення ідэалагічнай работы аблвыканкама Міхаіла Кузьміча, XVI Дзень беларускага пісьменства быў добра арганізаваны, свята наведалі тысячы чалавек. Адной з цэнтральных яго падзей стала адкрыццё помніка пачынальніку сучаснай беларускай літаратуры Францішку Багушэвічу.
Сярод пераможцаў рэспубліканскага конкурсу на лепшы твор у галіне паэзіі, прозы, драматургіі, літаратурнай крытыкі, дзіцячай літаратуры, публіцыстыкі, перакладу, сатыры і гумару, дэтэктыўнага і песеннага жанраў былі і пісьменнікі Віцебшчыны: дыпломам ІІ ступені ўганаравана полацкая паэтэса Надзея Салодкая, за сатырычную паэму «Успаміны пра майго асла» лаўрэатам стаў віцебскі пісьменнік Барыс Бележэнка.
У Смаргоні былі разгорнуты шматлікія выставы, прайшлі прэзентацыі.
Дэлегацыя Віцебскай вобласці падарыла бібліятэцы cмаргонскай СШ №4 55 кніжак паэтаў і пісьменнікаў Прыдзвіння, выдадзеных у мінулым годзе і сёлета. Нагадаем, што па колькасці сяброў Саюза пісьменнікаў Беларусі Віцебшчына займае трэцяе месца пасля суполак Мінска і Мінскай вобласці.
На ўрачыстым закрыцці адбылася цырымонія перадачы эстафеты свята. Наступны, XVII Дзень беларускага пісьменства, пройдзе ў Хойніках (Гомельская вобласць) на радзіме Івана Мележа, аўтара класічнай трылогіі «Людзі на балоце».

Сяргей Кавалеўскі, «НС».