Напярэдадні прафесійнага свята ў аршанскай дзіцячай бібліятэцы імя Ул. Караткевіча ўрачыста пасвяцілі ў чытачы вучняў пятых класаў сярэдніх школ №12 і №13.
Цырымонія пачалася ля ўваходу ва ўстанову, дзе казачныя персанажы правялі віктарыны. Веданне школьнікамі творчасці дзіцячых пісьменнікаў стала пропускам у бібліятэку. Экскурсія па краіне «Чыталія» пачалася з краязнаўчай майстэрні, дзе займаюцца краязнаўцы, праводзяцца ўрокі гісторыі, літаратурна-пошукавыя экспедыцыі і завочныя падарожжы ў мінулыя стагоддзі. У гэтай зале дзеці ўбачылі панно з выявамі беларускіх асветнікаў, якія праславілі Беларусь і Оршу. Сярод іх Еўфрасіння Полацкая і аўтар першага буквара Спірыдон Собаль. Потым у гасцёўні вучні пазнаёміліся з пісьменніцай Галінай Трафімавай, якая расказала ім пра серыю сваіх кніжак «Апавяданні Дзеда Прыродаведа», выдадзеных у сааўтарстве з Сяргеем Трафімавым.
Напрыканцы свята дырэктар бібліятэкі Валянціна Кошыкава ўручыла новаму папаўненню білеты чытача. Падняўшы рукі з білетамі, дзеці хорам сказалі на развітанне: «Я люблю чытаць!». А Валянціна Пятроўна для дарослых удзельні­каў мерапрыемства назвала некалькі фактаў і лічбаў, што тычацца дзейнасці ўстановы.
Бібліятэка заснавана ў 1948 годзе. Тады было пяцьсот чытачоў, цяпер – звыш пяці тысяч. Сённяшні фонд бібліятэкі – 53000 экземпляраў кніг. Сюды прыходзяць за інфармацыяй і бавяць вольны час дзеці ад дашкольнага да старэйшага школьнага ўзростаў, а таксама іх бацькі і настаўнікі, навучэнцы ліцэяў і каледжаў. За вялікую работу па папулярызацыі творчасці Уладзіміра Караткевіча ў 2005 годзе бібліятэцы прысвоена імя пісьменніка-земляка. У конкурсе ўстаноў Віцебшчыны яна адзначана абласным упраўленнем культуры як «Лепшая бібліятэка па развіццю гісторыка-патрыятычнай свядомасці насельніцтва».
– Пашырыць кола чытачоў дапамагаюць сучасныя методыкі, – адзначыла Валянціна Пятроўна. – Вывучаем попыт дзяцей і падлеткаў на літаратуру і стараемся яго задаволіць. Калі трэба знайсці матэрыял праз камп’ютэр, то ў нас абсталяваны тры такія месцы.
Па словах В. Кошыкавай, чытальная зала ўстановы атрымлівае 57 найменняў газет і часопісаў. Фарміруецца фонд па мастацтву з ілюстраваных кніжак, часопісаў і дыскаў. Аказваюцца паслугі па сканіраванню, ксеракапіраванню і іншыя.
Важны напрамак у прапагандзе ведаў – сустрэчы з пісьменнікамі, мастакамі, майстрамі Дома рамёстваў. У бібліятэку не раз прыходзілі пісьменнікі, якія маюць аршанскія карані. Так, нядаўна гасцямі ўстановы былі Янка Сіпакоў і Павел Саковіч. Усе пісьменнікі дораць свае творы, а нярэдка – і частку ўласных бібліятэк. У жніўні, напрыклад, сакратар Саюза пісьменнікаў Расіі Міхаіл Расолаў, які нарадзіўся на Гомельшчыне і зараз жыве ў Маскве, прывёз у падарунак бібліятэцы дзве свае кнігі-даследаванні пра дзейнасць Сімяона Полацкага і Францыска Скарыны. Абяцаў у хуткім часе зноў наведацца ў Оршу і выступіць перад чытачамі. Такія кантакты пісьменнікаў з дзецьмі і падлеткамі садзейнічаюць цікавасці да навуковай і мастацкай літаратуры. Колькасць жыхароў краіны «Чыталія» расце.

Вольга Шутава, «НС».