У першага інтэрактыўнага тэлебачання ў Беларусі з’явілася свая гандлёвая марка – «ZALA». Прэзентацыя яе адбылася ў мінулы аўторак у мінскім кінатэатры «Беларусь».
«ZALA» дае магчымасць не толькі праглядаць тэлепраграмы ў лічбавым фармаце, але і ў рэжыме рэальнага часу кіраваць тэлеэфірам: прыпыняць трансляцыю, вяртацца назад, запісваць упадабаную перадачу, ствараць свой расклад і шмат чаго іншага. Некаторыя дадатковыя сервісы, напрыклад, «Віртуальная кіназала», нават дазваляюць пазбавіцца ад надакучлівай рэкламы. Менавіта таму лозунг новага брэнда – «Кіруй сваім тэлебачаннем».
Рэклама брэнда на рынку паслуг вядзецца на беларускай мове – у пацверджанне нацыянальнай прыналежнасці маркі. Пакуль аднак інтэрфейс інтэрактыўнага тэлебачання аформлены толькі па-руску. Новая паслуга пачала распаўсюджвацца ў Беларусі, у тым ліку і на Віцебшчыне, больш за год таму. Аднак да нядаўняга часу, дакладней да 15 верасня, яе абанентамі не маглі быць юрыдычныя асобы, бо на гэта не давалі згоды праваўладальнікі каналаў. Сёння «ZALA» прадастаўляе фірмам і арганізацыям два тэлепакеты з інтэрактыўнымі функцыямі: «Карпаратыўны» (на 30 каналаў) і «Свет спорту» (каналы «Еўраспорт» і «Еўраспорт-2»).
Па словах дырэктара Віцебскага філіяла РУП «Белтэлекам» Аляксандра Бохана, у вобласці за год набралася каля 6 тысяч карыстальнікаў IPTV, у тым ліку ва ўсіх райцэнтрах, а таксама гарадскіх пасёлках, такіх як Коханава, Бягомль і іншых.
– Падключэнне ідзе высокімі тэмпамі, – кажа Аляксандр Іванавіч. – Асаблiва інтэрактыўнае тэлебачанне запатрабавана там, дзе няма кабельных аператараў і транслююцца хіба толькі 4 каналы, дый яшчэ не самай лепшай якасці паказу. Хаця з тэхнічнага боку адно другому не перашкаджае: можна, маючы кабельнае ці спадарожнікавае тэлебачанне, падключыць інтэрактыўнае. Яно больш даступнае для жыхароў прыватнага сектару гарадоў, куды аператары кабельнага ідуць неахвотна. Для падключэння неабходны звычайны тэлевізар, стацыянарны тэлефон і дамова на абслугоўванне. Ніякіх дадатковых правадоў цягнуць не трэба. Прычым тэлефаніі і Інтэрнету, калі той таксама падключаны, інтэрактыўнае тэлебачанне не замінае. Абсталяванне: ADSL-мадэм і прыстаўка Set Top Box – прадастаўляецца абаненту разам з замоўленым пакетам праграм на ўвесь перыяд карыстання. Пакет «Проста ТВ» (на 35 каналаў) каштуе 15200 рублёў у месяц, а пакет «Прэм’ера» з інтэрактыўнымі сервісамі кіравання праглядам – 32 тысячы. Ёсць і дадатковыя тэматычныя пакеты, накшталт «На канапе» (5 каналаў).
Дзякуючы «Вiртуальнай кiназале» вы маеце магчымасць глядзець найбольш рэйтынгавыя i папулярныя фiльмы, не выходзячы з дому, паказ фiльмаў ажыццяўляецца згодна з раскладам. А такі сервіс, як «Бацькоўскі кантроль» прыйдзецца даспадобы многім мамам і татам, бо з яго дапамогай можна ўстанавіць пароль на асобныя тэлеканалы ці перадачы, прагляд якіх дзецям не рэкамендаваны.
–  У гэтым годзе мы плануем усталяваць яшчэ некалькі дзесяткаў новых вузлоў сеткi передачы дадзеных у асобных раёнах вобласці, – дадае Аляксандр Бохан. – «Белтэлекам» прадпрымае ўсе намаганні для задавальнення патрэб сваiх карыстальнікаў.

Кацярына Князева, «НС».