У Мінску адбылося ўрачыстае ўручэнне прэмій Федэрацыі прафсаюзаў Беларусі 2009 года. Лаўрэатам у галіне літаратуры, мастацтва, журналістыкі і самадзейнай творчасці стаў і Віталь Гарановіч, старшыня Глыбоцкага раённага камітэта прафсаюза работнікаў адукацыі і навукі, а згодна абранаму творчаму жанру – паэт. Яго зборнік «Саракі» адзначаны ў намінацыі «За творы прозы, паэзіі і драматургіі». Аўтар атрымаў ганаровы знак, дыплом і грашовую прэмію.
Віталь Гарановіч пасля сканчэння філалагічнага факультэта Мінскага педінстытута ўвесь час жыве і паспяхова працуе на Глыбоччыне. Спачатку быў настаўнікам, дырэктарам школ. Узнагароджаны знакам «Выдатнік асветы».
Яго вершы публікуюцца ў раённым, абласным і рэспубліканскім друку. Віталь Рыгоравіч – аўтар зборніка паэзіі «Беразвечча», выдадзенага ў 1997 годзе, адзін з аўтараў калектыўных зборнікаў «Дзвіна», «Браслаўшчына азёрная мая», «Далягляды», член Саюза беларускіх пісьменнікаў.
А «Саракі» пабачылі свет пазалетась у сталічным выдавецтве «Кнігазбор». У творах глыбоцкага паэта высвечваецца гістарычная памяць, беларуская годнасць, гонар за сваю Бацькаўшчыну. Яго мастацкая думка віецца вакол той мясціны, адкуль «плакучаю вярбою глядзіць самотна ў начны прастор» родная хата, дзе вочы «жывуць надзеяй светлай кожны раз» і «знічкі сыплюцца бурштынам у Дзвіну, што бачыла Скарыну», дзе надзея ёсць, што «ад бяспомных душа абароніць мову нашу і род-карані».
Радкі павагі прысвечаны класікам беларускай літаратуры Янку Купалу, Якубу Коласу, Максіму Багдановічу, словы ўдзячнасці і захаплення гучаць з глыбіні сэрца ў адрас Аляксандра Пушкіна і Сяргея Ясеніна.
На вершах Віталя Гарановіча можна вучыцца вобразнаму мысленню – тут нямала жывых параўнанняў, яркіх метафарычных прыкладаў.

«Зажурыла восень
цішыню
Туманом,
як пенай сырадою».
Альбо яшчэ:
«Густы сявец туману
Глыне ля рэчкі вечар.
І пад шулы паркану
Падставіць мякка плечы».

Шмат у кнізе і іншых выразных іскрынак. Шмат шчырай узнёсласці і захаплення яго вялікасцю Жыццём, што абавязкова перадаюцца чытачам. А яны ў Віталя Гарановіча ёсць і будуць. У тым ліку – калегі-настаўнікі, якім ён дапамагае ў прафесійных справах як прафсаюзны важак і проста добразычлівы чалавек, з якімі імкнецца падзяліцца сваім творчым натхненнем.

Аляксандр Суханаў, старшыня абкама прафсаюза работнікаў адукацыі і навукі.