На працягу года ў абласным метадычным цэнтры народнай творчасці праходзіў конкурс сцэнарных распрацовак па духоўна-маральным выхаванні моладзі і падрастаючага пакалення пад назвай «У будучае з любоўю».
Аўтары ўстаноў культуры з 20 раёнаў і гарадоў вобласці прадставілі на прагляд і аналіз звыш 50 сцэнарыяў, ужо ўвасобленых у практыцы клубных устаноў, па намінацыях: лепшы сцэнарый героіка-патрыятычнага гучання, духоўна-маральнай накіраванасці для дзяцей і падлеткаў, для моладзі і па папулярызацыі аўтэнтычнага фальклору. Журы адзначыла разнастайнасць форм мерапрыемстваў, рознабаковасць прадстаўленых тэм у сцэнарыях, шырокі светапогляд культасветчыкаў. Гэта бачна праз формы, аўтарскія тэксты і рэжысёрскую пастаноўку ў  інтэлектуальным ток-шоу «Мы – беларусы і гэтым ганарымся», «Выбар: служба ў арміі – за і супраць», конкурсе творчых работ «Вайна ў гісторыі маёй сям’і», раённым свяце нацыянальных культур «Зямля пад белымі крыламі». Вечар-сустрэча з уладыкам Феадосіем, архіепіскапам Полацкім і Глыбоцкім, прысвячалася святому Вялікадню і называлася «Бываюць дні, калі маліцца вельмі лёгка» і г. д. Лепшыя работы будуць надрукаваны ў інфармацыйна-метадычных выданнях АМЦНТ.
Семнаццаці аўтарам за лепшыя сцэнарыі па розных намінацыях 30 кастрычніка ўручаны дыпломы. Вось некаторыя імёны лаўрэатаў: Людміла Дарзнек і Вольга Мульц з Шумілінскага РАМЦ – за сцэнарый «Тэатралізаванае шэсце на свяце г.п. Шуміліна «Родная зямля»; Марыя Кімстач з Валкалацкага СДК Докшыцкага раёна – за сцэнарый літаратурна-музычнай кампазіцыі «Навекі слава тым, хто зведаў франтавы агонь і дым»; Святлана Зайцава з Полацкага РДК – за сцэнарый конкурсу паміж сем’ямі ў рамках раённага свята «Сям’я – гэта тое, што з табою побач», прысвечанага Дню маці; Ала Шулья з Далёкаўскага СДК Браслаўскага раёна, якая стварыла цыкл сцэнарыяў па папулярызацыі аўтэнтычнага фальклору.

Ала Лялькіна, вядучы метадыст АМЦНТ.