З 29 лістапада па 3 снежня на сцэне Нацыянальнага тэатра імя Якуба Коласа выступае Санкт-Пецярбургскі дзяржаўны акадэмічны тэатр балета імя Леаніда Якабсона. Госці прапануюць вяцяблянам балеты «Рамэо і Джульета» Сяргея Пракоф’ева, «Лебядзінае возера» Пятра Чайкоўскага, «Спартак» Арама Хачатурана.
Санкт-Пецярбургскі тэатр у рэкамендацыях патрэбы не мае. Тры гады таму гастролі тэатра балета імя Л. Якабсона на коласаўскай сцэне прайшлі з аншлагам. Госцям уласцівы адметная культура, высокае майстэрства і адданасць абранай прафесіі. А класічны балет заўсёды запатрабаваны ў сталіцы Міжнароднага фестывалю харэаграфіі.
Коласаўцы тым часам будуць радаваць сваім мастацтвам жыхароў Расіі. Творчыя групы тэатра са спектаклямі-камедыямі «Аднакласнікі» і «О-ля-ля!» наведаюць Бранск, Арол і Смаленск. Дарэчы, гэты гастрольны тур – візіт у адказ. Вясной і восенню сёлета коласаўцы прымалі на сваёй сцэне Бранскі драматычны тэатр імя А. Талстога, арлоўскі тэатр для моладзі «Свабодная прастора» і Смаленскі драматычны тэатр імя А. Грыбаедава. А летась ў чэрвені на міжнародным тэатральным фестывалі «Смаленскі каўчэг» спектакль Коласаўскага тэатра «Дадому» адзначаны галоўным прызам, а выканаўца ролі Алены Алена Ганум атрымала прыз Саюза тэатральных дзеячаў Расіі «За лепшую жаночую ролю».

Святлана Дашкевіч.