Р. Мурзіч і А. Квяткоўскі.

Напярэдадні свята Божага Нараджэння ў Віцебскай каталіцкай дыяцэзіі прайшла традыцыйная сустрэча з журна-лістамі. Сёлета на ёй адсутнічаў біскуп Уладзіслаў Блін, бо разам з іншымі ерархамі беларускага касцёла ён у Ватыкане трымае своеасаблівую справаздачу перад Папам Рымскім Бенедыктам XVI. Прэс-канферэнцыю праводзілі канцлер Віцебскай дыяцэзіі Раман Мурзіч і настаяцель законнай супольнасці сальватарыянаў у Браславе Адам Квяткоўскі.
Айцец Адам нагадаў прысутным, што да 22 жніўня 2010-га доўжыцца юбілейны год каранацыі браслаўскага абраза Маці Божай Валадаркі азёраў. Сведчанне таму – вялікая колькасць пілігрымаў-удзельнікаў каранацыйных урачыстасцяў. Святар запрасіў у Браслаў сем’і нашай вобласці, каб яны перад абліччам Маці Божай маглі аднавіць сваю сужэнскую прысягу і атрымаць пастырскае блаславенне.
Ксёндз Раман адзначыў, што чатыры тыдні перад святам Божага Нараджэння працягваецца перыяд Адвенту – час радаснага чакання прыйсця Збаўцы. У гэты перыяд практыкуецца наведванне выхаванцаў дзіцячых дамоў, хворых людзей, бо гэтым катэгорыям нашага грамадства найбольш патрэбна апека.
Пазнаёміў канцлер з некаторымі асаблівасцямі святкавання Раства ў католікаў Беларусі. Перш за ўсё гэта абавязковая яліна, зорка, свечкі, пабожнае чытанне Святога Пісання. Таксама падчас святкавання пад абрус кладзецца сена, каб не забываліся на тое, што Езус нарадзіўся ў простай стайні.
З 17 снежня да 4 студзеня ў вобласці працягваецца фестываль «Дні хрысціянскай культуры». У яго рамках адбудуцца выстава дзіцячай творчасці «Скарбніца Раства» ў Мастацкім музеі, фотавыставы ў ВДУ і ветакадэміі, конкурс батлеек, шматлікія канцэрты...