Требуется для просмотраFlash Player 9 или выше.

Статистика сайта

З 10 па 19 студзеня па ўсёй Беларусі традыцыйна доўжыцца самы актыўны перыяд калядаванняў.

У гэтыя дні музей-сядзіба Рэпіна «Здраўнёва» таксама запрашае на свята. Гасцей тут чакае не проста тэатралізаваная праграма, а сапраўдная «жывая батлейка» (на фота). Як патлумачыла загадчыца Літаратурным музеем Святлана Казлова, рэгіянальнай асаблівасцю Віцебшчыны з’яўляецца тое, што ролю персанажаў у гэтым традыцыйным беларускім тэатры ў нас выконвалі не лялькі, а жывыя людзі. А сёння ў гасцей музея-сядзібы з’явілася цудоўная магчымасць не толькі зрабіць невялічкі экскурс у гісторыю святкавання Калядаў, але і паўдзельнічаць у прадстаўленні.

Праграму, падрыхтаваную супрацоўнікамі Літаратурнага музея і іншых падраздзяленняў абласнога краязнаўчага, «апрабавалі» ў мінулую нядзелю на першай групе турыстаў – работніках Віцебскага аўтавакзала і іх сем’ях. Гасцей сустрэлі Звяздар (Святлана Марозава) з каляднай зоркай і Дзед Пачынальнік (загадчык музеем-сядзібай Аляксей Сухарукаў), а таксама іншыя персанажы, сярод якіх Гаспадыня, Цыганка з Кабылкай, Маладзец з Маладзіцай, Мядзведзь і іншыя.

Адным з цэнтральных персанажаў здаўна лічыцца Каза. Дзе яна нагой топне, там дабрабыт увесь год будзе. У такой кампаніі госці, якія, дарэчы, самі прыехалі ў касцюмах, шчыра весяліліся, бавілі час у карагодах і конкурсах. Паглядзелі і традыцыйную беларускую батлейку ў скрыні пра цара Ірада. Пакружылі на санях-каруселях дый проста пагулялі па заснежаных сцяжынках вакол сядзібы. Пабывалі на экскурсіі ў галаўным будынку музея. Аднойчы, у 1895 годзе, Рэпін пабываў тут не ўлетку, як звычайна, а падчас зімніх свят. І, магчыма, стаў сведкам, а мо, і ўдзельнікам калядных забаў. Мінула ўжо больш за стагоддзе, а традыцыя жыве. І дзякуючы музейшчыкам дакрануцца да сваіх каранёў сёння можа кожны.

Кацярына Князева, фота аўтара, «НС».