У аршанскім музеі Уладзіміра Караткевіча адбылася прэзентацыя новага зборніка літаратурнага аб’яднання «Дняпроўскія галасы». Аднайменнае выданне прысвечана 60-годдзю аб’яднання, створанага пры рэдакцыі газеты «Ленінскі прызыў» (зараз «Аршанская газета»).
Аўтар прадмовы «На добрай глебе – добры колас» – журналіст, кіраўнік творчай суполкі ў 1968–1977 гг. Фёдар Кулакоў. Ён згадвае шмат аўтараў, чые паэтычныя галасы гучаць па-над Дняпром сёння. Вакол літаб’яднання гуртуюцца людзі, якія шануюць свае карані, дбаюць пра літаратурную будучыню Аршаншчыны.
Сярод аўтараў зборніка — члены Саюза пісьменнікаў Беларусі: Генадзь Казак, Канстанцін Нілаў, Анатоль Прохараў, Рыгор Лазуркін і іншыя.
…У зале панавала атмасфера адзінства,творчай роднасці прысутных. Гэта не дзіўна, бо менавіта ў музеі Уладзіміра Караткевіча збіраюцца члены літаб’яднання. Тут праходзяць прэзентацыі твораў аршанскіх літаратараў, адбываюцца святы паэзіі, дні памяці Уладзіміра Караткевіча. Загадчыца музея Галіна Юркевіч і старшы навуковы супрацоўнік Вольга Пашкевіч робяць усё, каб «Дняпроўскія галасы» пачувалі сябе тут як дома.
З выхадам зборніка прысутных павіншавала начальнік аддзела культуры Аршанскага гарвыканкама Ганна Святлова. На прэзентацыю былі запрошаны госці з Віцебска: лаўрэат міжнародных прэмій старшыня абласнога аддзялення Саюза пісьменнікаў Беларусі Тамара Краснова-Гусачэнка і паэтка Валянціна Пчолка, якая асабіста была знаёма з Уладзімірам Караткевічам.
Гучалі вершы, аўтарскія песні, цёплыя словы і добрыя пажаданні. Як паведамілі ўкладальнікі зборніка, рыхтуецца да выдання другі том гэтай паэтычнай анталогіі Оршы.

Леся Красавік.