Падведзены вынікі чарговай рэспубліканскай алімпіяды сярод школьнікаў. Па фізіцы, астраноміі і матэматыцы фінал яе праходзіў у Віцебску. У мінулую пятніцу ў Нацыянальным драматычным тэатры імя Я. Коласа ўрачыста ўганароўвалі самых лепшых з юных знаўцаў гэтых прадметаў.

Пераможцам і прызёрам уручаны адпаведна дыпломы 1-3 ступеняў, пахвальныя водгукі і падарункі. Апрача таго, удзельнікі фіналу, якія атрымалі лепшыя вынікі ў сваіх намінацыях, адзначаны прызамі старшыні аблвыканкама Аляксандра Косінца,  міністра адукацыі Беларусі Аляксандра Радзькова, старшыні Віцебскага гарвыканкама Віктара Нікалайкіна, Фізічнага таварыства Беларусі. Ад імя кіраўніка нашай вобласці тэлевізары «Віцязь» падораны самым выніковым удзельнікам фіналу па трох памянёных прадметах з каманды Віцебшчыны: адзінаццацікласніку віцебскай гімназіі №8 Сяргею Доўгалю (дыплом 1-й ступені па матэматыцы), адзінаццаціклас-ніку віцебскай СШ №31 Арсенію Новаку (дыплом 3-й ступені па астраноміі) і першакурсніку Віцебскага філіяла Вышэйшага каледжа сувязі Сяргею Бандарэнку (дыплом 1-й ступені па фізіцы) – на фота.
Усяго ў фінале алімпіяды па 16 прадметах удзельнічалі 202 вучні з нашай вобласці. Здабытак – 90 дыпломаў. Самы вялікі поспех выпаў на долю юных матэматыкаў: 21 дыплом. З іх ажно 18 атрымалі выхаванцы заслужанага работніка адукацыі Беларусі, кавалера ордэна Францыска Скарыны Міхаіла Волкава (віцебская гімназія №8).

Галіна Шпакоўская, «НС». Фота Антона Сцепанищчава, «НС».