Требуется для просмотраFlash Player 9 или выше.

Статистика сайта

ФК «Віцебск» – «Дняпро» (Магілёў) – 1:1
Перад пятым турам чэмпіянату ў вышэйшай лізе «Віцебск» узначальваў турнірную табліцу і, здавалася, лідэрства захаваецца: чарговы сапернік быў не з ліку фаварытаў. Аднак у выніку гаспадарам поля прыйшлося добра папрацаваць, каб выратаваць хоць бы адно ачко.
Між тым, нягледзячы на коўзкае і вязкае поле, футбалісты абедзвюх каманд паказалі неблагую гульню. Дэбют сустрэчы быў за магіляўчанамі, але пакрысе гаспадары поля трывала завалодалі ініцыятывай. Вельмі добра на левым фланзе выглядала звязка нашых легіянераў – Сарокін і Ксянзоўс. Самы небяспечны момант узнік пасля магутнага стрэлу з-за межаў штрафной у выкананні Андрэя Баранка, але варатар «Дняпра» Руслан Капанцоў нейкім цудам парыраваў удар. Тут жа перад варотамі апынуўся наш лепшы бамбардзір Руслан Усаў, але ўдар галавой у яго не атрымаўся.
Пасля перапынку «Віцебск» працягваў асаду варот гасцей. Здавалася, гол – справа часу. Аднак нулі на табло заставаліся. А вось «Дняпро» свой ці не адзіны шанец рэалізаваў. За тры хвіліны да заканчэння сустрэчы сам-насам з нашым галкіперам апынуўся Андрэй Лясюк, які дакладна прабіў у вугал варот. Да гонару нашых землякоў, яны працягвалі змагацца да апошняга, і ўжо ў дадатковы час капітан каманды Ігар Трухаў у мітусні ў штрафной гасцей здолеў зраўняць лік.
Пасляматчавыя каментарыі.
Андрэй Скарабагацька, галоўны трэнер «Дняпра»:
– Вельмі добрая атрымалася партыя. Нягледзячы на надвор’е, думаю, гледачы засталіся задаволенымі. Такім футбол і павінен быць.
Юрый Канаплёў, галоўны трэнер ФК «Віцебск»:
– Цалкам згодны з калегай. Хачу падзякаваць хлопцам за гульню, бо сёння вельмі ўжо крыўдна было б прайграваць.
P.S. Наваполацкі «Нафтан» дома саступіў 0:2 чэмпіёну – барысаўскаму БАТЭ – і адкаціўся на сёмы радок турнірнай табліцы. Віцябляне ж з вяршыні апусціліся на пятае месца.

Алесь Бынькоў, «НС».