У Мінску адбыўся традыцыйны рэспубліканскі фестываль-кірмаш рамёстваў «Веснавы букет». Яго разнастайная праграма прадугледжвала і конкурс майстроў з розных куткоў нашай краіны. Іх работы ацэньвала журы , якое ўзначальваў старшыня Беларускага cаюза майстроў народнай творчасці Яўген Сахута. Прызёрамі фестывалю сталі Марына Гушчо з Гарадка (намінацыя ткацтва), Таццяна Марціновіч з Докшыц (саломапляценне) і яе зямляк – разьбяр Іван Плыгаўка. Майстра апрацоўкі скуры Ігар Яўсціхаў з Віцебскага раёна, віцяблянкі Любоў Трыгубенкава (ткацтва паясоў) і Ларыса Казачонак (выцінанка) таксама  сталі пераможцамі конкурсу. Усяго ў фестывалі-кірмашы ўдзельнічалі шэсць каманд Віцебшчыны.

Ніна Лук’янава, «НС».

«Заборскі фэст» сустрэне конным парадам

Рэспубліканскі фестываль сельскага турызму «Заборскi фэст» сёлета распачнецца 5-6 чэрвеня «конным» святам, першым у Беларусі. Гасцей фэсту чакае выстава-продаж коней і амуніцыі, спаборніцтвы па трэйлу, адукацыйныя семінары і шматлікія забавы, у тым ліку касцюміраваны конны парад. А ўжо 12-13 чэрвеня распачнецца, згодна са сцэнарыем, другі этап свята. У яго праграме прэзентацыі турыстычных маршрутаў і аграэкасядзіб раёна, традыцыйны кірмаш рамесніцкіх вырабаў і народных страў хатняга гатунку, а таксама тэатралізаванае прадстаўленне і канцэрт. Увечары можна будзе паглядзець гістарычныя кінастужкі, паслухаць бардаўскія песні ля вогнішча, патанчыць на дыскатэцы. Закрые фэст свята рыбака на возеры Белае.

Кацярына Князева, «НС».