Як вядома, Бярэзіна – адна з найпрыгажэйшых рэк Беларусі – мае пачатак на паўднёвым захадзе ад Докшыц. У свой час у цэнтры горада зрабілі дамбу, і замест невялікай рачулкі атрымалася маляўнічае вадасховішча, якое стала адметным месцам адпачынку мясцовых жыхароў. А не так даўно штучнае возера аблюбавалі лебедзі. І калі ў ранейшыя гады тут сялілася адна пара, то сёлета – ажно 18 грацыёзных птушак.
Мясцовы таксіст Аляксандр расказаў, што адна пара лебедзяў заставалася да самых маразоў. Неяк лістападаўскай раніцай, апынуўшыся ля вадасховішча, ён убачыў, што птушкі сядзяць на лёдзе. Падумаў: умёрзлі і хацеў ужо тэлефанаваць у райаддзел МНС, каб ратавалі белакрылых. Але яны ўзняліся і паляцелі ў вырай. А вось гэтай вясной пара пастаяльцаў, відаць, сагітавала родзічаў, каб і тыя «прапісаліся» на докшыцкім вадасховішчы.
Кармавая база тут, як кажуць, добрая. Вадаём мае ладную плошчу, таму планктону хапае. Да таго ж мясцовыя жыхары частуюць птушак хлебам. Час ад часу, заўважыўшы чалавека на невялікай прыстані, лебедзі збіваюцца ў гурт і падплываюць паласавацца. Атрымалі яны пачастунак і ад карэспандэнтаў «Народнага слова». Лапы некаторых птушак акальцаваны, таму арнітолагі з лёгкасцю могуць устанавіць, з якога такога выраю прыляцелі ў Докшыцы лебедзі.

Сяргей Ляшук, «НС».