Старонка для падлеткаў i моладзiО работе милиции

Что советуют медикиНовости спорта

5 верасня – Дзень беларускага пісьменства. Нагадаем, што ўпершыню гэта цудоўнае свята ў нашай краіне пачалі адзначаць з 1994 года. Тады яно адбылося ў Полацку.
Традыцыя праводзіць Дзень беларускага пісьменства ў гарадах, слынных гісторыяй, сведчыць пра паважлівае стаўленне народа да сваіх каранёў, да спадчыны продкаў. Гэта свята літаратараў, выдаўцоў, бібліятэкараў, чытачоў – усіх, хто шануе родную мову, роднае слова. Сёлетняя яго сталіца – горад Хойнікі Гомельскай вобласці.
Упершыню ён згадваецца 1512 годам як вёска Брагінскага графства Вялікага княства Літоўскага. Хойнічак, Хвайнічок – згодна самай распаўсюджанай версіі, назва гэтага палескага паселішча паходзіць ад слова «хвоя». Аднак ёсць і іншае меркаванне, бо хойнік – старажытнагрэчаская мера сыпучых цел, упамінаецца яшчэ ў Гамера і вызначае колькасць збожжа, неабходнага для аднаго чалавека на дзень.
У гады Вялікай Айчыннай вайны Хойнікі былі амаль цалкам спалены ворагам. Пацярпеў гэты райцэнтр у мінулым стагоддзі і ад чарнобыльскай катастрофы. Ды яго жыхары – вялікія патрыёты свайго краю і нястомныя працаўнікі, кожным разам вярталі свой горад да паўнакроўнага жыцця.
Ураджэнцы Хойніччыны зрабілі важкі ўнёсак у скарбонку нацыянальнага пісьменства. Першы ў гэтым спісе – Часлаў Пяткевіч, аўтар манаграфіі «Рэчыцкае Палессе», каштоўнай працы пра матэрыяльную культуру рэгіёна, а таксама шматлікіх артыкулаў. Сучасным аматарам беларускай літаратуры вядомы імёны Барыса Сачанкі, Івана Сачанкі, Дзмітра Бяспалага, Алы Канапелькі, Аркадзя Кандрусевіча, Алеся Шлега, Міколы Мятліцкага, шэрагу гісторыкаў і публіцыстаў.
А найвялікшы гонар Хойніччыны – народны пісьменнік Беларусі Іван Мележ (1921-1976 гг.). Ён нарадзіўся ў вёсцы Глінішча, удзельнік Вялікай Айчыннай вайны, быў двойчы паранены. У мірны час Іван Паўлавіч – вядомы грамадскі дзеяч.
У сваёй літаратурнай творчасці апеў, узвысіў роднае Палессе так, што героі яго прозы сталі блізкімі людзьмі для некалькіх чытацкіх пакаленняў. Творы гэтага беларускага класіка выдадзены ў дзесяці тамах, былі перакладзены на шматлікія мовы колішняга СССР і замежныя. Самая маштабная літаратурная праца Івана Мележа – трылогія «Палеская хроніка» («Людзі на балоце», «Подых навальніцы», «Завеі, снежань») – несмяротны шэдэўр беларускай літаратуры. Тут праўдзіва паказаны лёс сялянства ў пераломны перыяд гісторыі, багацце і разнастайнасць людскіх характараў і грамадскіх працэсаў, узняты глыбінныя пласты нацыянальнага жыцця.
Імем народнага пісьменніка названы вуліцы ў Мінску, Хойніках, Лельчыцах, Кобрыне, школы і бібліятэкі па ўсёй рэспубліцы. На радзіме ў Глінішчы створаны Літаратурны музей І. Мележа. У Мінску, на доме, дзе жыў Іван Паўлавіч, ёсць мемарыяльная дошка. З 1980 года ўстаноўлена Літаратурная прэмія Саюза пісьменнікаў Беларусі імя І. Мележа. У кожным горадзе, які станавіўся сталіцай Дня беларускага пісьменства, вызначалі свайго духоўнага героя. У Хойніках гэта Іван Мележ.
Сёння Хойнікі – прыгожы беларускі гарадок. Яго адметнасці – багаты краязнаўчы музей, некалькі бібліятэк, Дом рамёстваў, Свята-Пакроўскі жаночы манастыр. І да свята гэты палескі райцэнтр як мае быць прыхарашыўся. Варта з’ездзіць, бо гасцям тут заўсёды рады.

Интересное видео

Новости Витебщины

Тематические страницы

Читателям

Чтобы улучшить связь с читателями, «Народнае слова» открывает виртуальную «жалобную книгу». На нашем сайте вы можете оставить свое замечание по любому поводу.

Календарь материалов

Архив новостей

Архив новостей по месяцам

Опрос сайта

Новости Беларуси

24.08.2010

Новость посмотрели: 5419

Рейтинг материала:

Данная новость взята из рубрики:

Похожие новости по теме :