Важкі ўнёсак робяць нашы землякі ў скарбонку айчыннага пісьменства і прапаганду лепшых яго традыцый. Напрыклад, сёлета свет пабачылі 15 кніг, аўтарамі якіх з’яўляюцца члены абласнога аддзялення Саюза пісьменнікаў Беларусі. Імі апублікавана і шмат літаратуразнаўчых, публіцыстычных артыкулаў у перыёдыцы.
Прыхільна сустрэты чытачамі творы Тамары Красновай-Гусачэнка, Барыса Бележэнкі, Мікалая Балдоўскага, Галіны Трафімавай і Сяргея Трафімава, Генадзія Катлярова, шэрага іншых літаратараў. За паўгода аддзяленнем СПБ праведзена больш за 300 творчых сустрэч у працоўных калектывах і студэнцкіх аўдыторыях, у бібліятэках і школах.
Віцебская абласная друкарня за сем месяцаў бягучага года выпусціла агульнай колькасцю 4,9 млн. экзэмпляраў розных часопісаў і 1,3 млн. кніг і брашур. Толькі адсюль да чытача адпраўляюцца газеты ажно 62 найменняў, у тым ліку і «Народнае слова».
Багацее кнігазбор кожнай з 666 бібліятэк, якія працуюць у гарадах і вёсках Віцебшчыны. У агульнай колькасці гэта каля 8,5 мільёна экзэмпляраў. А наведваюць бібліятэкі сёння больш за 450 тысяч юных і сталых чытачоў.
Захаванню традыцый нацыянальнага пісьменства актыўна спрыяюць музеі: беларускага кнігадрукавання – у старажытным Полацку, віцебскі Літаратурны, мемарыяльны Уладзіміра Караткевіча ў Оршы, філіял Рэспубліканскага літаратурнага музея Янкі Купалы ў Ляўках (Аршанскі раён), Дом-музей Петруся Броўкі ў Пуцілкавічах на Ушаччыне і многія іншыя культурна-асветніцкія ўстановы вобласці.

Галіна Іванова, «НС».