Народны ансамбль песні «Прызбачка».

У Докшыцкім раёне шэсць калектываў мастацкай самадзейнасці маюць званне народных. З іх два ўганараваны зусім нядаўна, у тым ліку – ансамбль песні «Прызбачка» Валкалацкага Дома культуры.

Мастацкі кіраўнік як установы, так і ансамбля, ён жа акампаніятар-акардэаніст – У. Чыкун. Вось ужо дзесяць гадоў гэтыя самадзейныя артысты радуюць гледачоў сваім майстэрствам. Па словах Уладзіміра Часлававіча, «няблага засвяціліся з канцэртамі на вобласці». Часцей чым дзе «Прызбачка» выступае, вядома ж, у роднай вёсцы, у Докшыцах, а таксама на Мядзельшчыне (Мінская вобласць), на Глыбоччыне. Двойчы спявалі ў Оршы, у тым ліку на рэспубліканскім свяце-кірмашы «Дажынкі».
У рэпертуары каля сотні песень: беларускія, украінскія і рускія. Шэраг іх запісалі і развучылі з дапамогай мясцовай, як кажуць спецыялісты, носьбіткі фальклору – Алены Шылько.
Фірменная, ці, як зараз кажуць, «візітка», – «Валкалацкая прызба». Музыка Уладзіміра Чыкуна, а тэкст напісала настаўніца беларускай мовы і літаратуры мясцовай сярэдняй школы Алена Несцяронак (дарэчы, прыгажуня з доўгай касой).
Ці то будзень, ці то свята –
Не сціхаюць песні-пляскі.
Ўсіх на прызбу Валкалата
Запрашае: калі ласка!
Гэтай песняй ансамбль пачынае свае выступленні, а заканчвае рознымі. Удзячныя гледачы добра ведаюць рэпертуар валкалацкіх артыстаў (канцэрты, між іншым, платныя). Таму вельмі часта ўголас падаюць «заяўкі» на той ці іншы нумар, а пасля выступлення «Прызбачкі» ў такт сваім апладысментам дружна крычаць: мала, мала!
У асноўным складзе ансамбля – пяць жанчын і чацвёра мужчын. У тым ліку дырэктар Дома культуры Марыя Кімстач (родная сястра У. Чыкуна) з мужам – жывёлаводам Яўгеніем Кімстачам, настаўнікі, медыкі – усе валкалацкія. А ўвогуле ўдзельнікаў больш, бо сюды ўваходзіць і група старшакласнікаў мясцовай школы.
Ансамбль мае два камплекты касцюмаў: адзін даволі старэнькі, затое другі па заказу аддзела культуры райвыканкама пашыты ў мінскай «Скарбніцы», дзе для сцэны апранаюцца знакамітыя, масцітыя калектывы Беларусі. Акардэон не самы лепшы і па ўзросту ветэран.
Зараз у Доме культуры рамонт. Навагоднюю праграму падрыхтавалі, можна сказаць, у экстрэмальных умовах. Выступала «Прызбачка» і падчас выбараў. А ў Дзень работнікаў сельскай гаспадаркі валкалацкія артысты спявалі ў вёсцы Габы на Мядзельшчыне (10 км адсюль). Зал быў паўнюткі, бо ансамбль добра вядомы тамтэйшаму гледачу.
«На гастролі» гэтая апантаная суполка звычайна ездзіць на легкавіках дырэктара і мастацкага кіраўніка ДК, іншы раз і ўдзельнік ансамбля Ігар Ляпкоў выручае. Бывае, што аўтобус з Докшыц прысылаюць. Выступленні – па выхадных і ў святочныя дні, але ніхто з удзельнікаў «Прызбачкі» не супраць, бо душой прыкіпелі да творчасці. Чыкун жартуе: каб і хацеў каго выгнаць, – не атрымаецца.

Галіна Шпакоўская, «НС». Фота з асабістага архіва У. Чыкуна.