Требуется для просмотраFlash Player 9 или выше.

Статистика сайта

Трэцяга ліпеня ў Чашніках асноўным месцам святочнай дзеі была плошча, дзе прайшлі афіцыйныя ўрачыстасці і народныя гулянні. Мясцовым байкерам было даручана давезці сюды дзяржаўны, абласны і раённы сцягі. Пад гукі духавога аркестра школы мастацтваў устанавілі іх на самым відным месцы лепшыя працаўнікі Чашніччыны. Затым – прадстаўленні юных барабаншчыц і спартсменаў. Сваім выканаўчым майстэрствам удзельнікаў свята парадаваў народны ансамбль народнай песні «Ульчанка». Прайшлі разнастайныя конкурсы, на стадыёне памераліся сіламі аматары спорту – усё проста не пералічыць.

Запрашалі ўсіх

Дзень Незалежнасці ў Браславе пачаўся ўскладаннем вянкоў да помніка загінуўшым вызваліцелям. Затым на плошчы адбыўся мітынг з удзелам раённага кіраўніцтва, прадстаўнікоў грамадскасці і, канешне ж, ветэранаў. На ўрачыстасці ўшанавалі новых ганаровых грамадзян Браслаўскага раёна. Гэта ветэран вайны Іван Кожар і яго жонка Зінаіда Кожар – заслужаныя настаўнікі Беларусі, а таксама заслужаны работнік прамысловасці, кавалер ордэна «Знак Пашаны» Генадзь Карло. Упершыню прайшоў парад рознагаліновай тэхнікі айчынных марак, якая задзейнічана ў мясцовай эканоміцы. А на стадыёне адгрымеў канцэрт самадзейнасці. Ва ўсіх сельсаветах Браслаўшчыны прайшлі мітынгі-рэквіемы, сустрэчы з ветэранамі Вялікай Айчыннай.

Дождж настрою не перашкодзіў

У Лепелі – шэсць мемарыяльных аб’ектаў, звязаных з падзеямі перыяду Вялікай Айчыннай. Зранку ў Дзень Незалежнасці ў гэтых куточках горада дэлегацыі мясцовых працоўных калектываў ушанавалі памяць загінуўшых. Ускладанне вянкоў да трох помнікаў на плошчы Свабоды адбылося падчас мітынга. Перад яго ўдзельнікамі выступілі старшыня райвыканкама Пётр Шыкшнян, кіраўнік ветэранскай арганізацыі раёна Павел Ханяк, школьніца-выпускніца Вольга Шапка і в. а. начальніка Заслонаўскага гарнізона палкоўнік Сяргей Шыянок. Маршам пад песню прайшлі воіны гэтага гарнізона. Іграў духавы аркестр. Святочная праграма працягвалася ў парку ля возера. І хаця лінуў дождж, настрой у лепяльчан не сапсаваўся.

Мемарыяльны знак воіну-вызваліцелю

У Шаркаўшчыне з нагоды Дня Незалежнасці ўвекавечана памяць камандзіра батарэі 1720-га зенітна-артылерыйскага палка гвардыі лейтэнанта Мінаса Назарэцяна. Ён загінуў 4 ліпеня 1944 г. пры вызваленні гэтага населенага пункта і быў пахаваны ў брацкай магіле на плошчы. Рашэннем райвыканкама імем М. Назарэцяна названы мост праз раку Дзісну і побач з ім устаноўлены мемарыяльны знак. Да яго ўдзельнікі шматлюднага святочнага мітынга ўсклалі вянкі і кветкі. На цырымоніі прысутнічалі родныя воіна, якія штогод наведваюць месца яго апошняга спачыну.

Змагарам — памяць, працаўнікам — пашана

У мінулую нядзелю ва Ушацкім райвыканкаме ўрачыста адкрылі раённую Дошку гонару. Затым пераможцаў спаборніцтва па выніках 2010 года чакала ўшанаванне ў Доме культуры. Лепшыя калектывы адзначаны дыпломамі, а шэраг працаўнікоў – прэміямі і падзячнымі пісьмамі ад мясцовага кіраўніцтва. Агульным жа падарункам для ўсіх  стаў канцэрт мастацкай самадзейнасці.
А на славутым мемарыяльным комплексе «Прарыў» людзі сабраліся на мітынг, прысвечаны памяці загінуўшых тут  падчас фашысцкай блакады. На мерапрыемства запрасілі і родзічаў удзельнікаў тых гераічных падзей. Да манумента леглі вянкі, адгукнулася цішынёй хвіліна маўчання, прагучалі словы ўдзячнасці змагарам за незалежнасць ад гітлераўскай навалы.

«Квітней, Глыбоччына!»

Пад такой назвай у гэтым раёне адбыўся шэраг святочных мерапрыемстваў –  традыцыйных і новых. Мітынгі-рэквіемы ў райцэнтры і сельскіх Саветах пачаліся ўжо з першага ліпеня. Гараджане і вяскоўцы наведалі магілы загінуўшых удзельнікаў вызвалення Глыбоччыны і ахвяр фашысцкага тэрору.
Назаўтра лепшыя прадстаўнікі працоўных калектываў раёна прайшлі шэсцем па Глыбокаму. Іх віталі кіраўнікі мясцовай улады, адметныя землякі. А маленькія жыхары і іх бацькі былі запрошаны на адкрыццё новай дзіцячай пляцоўкі на беразе возера Кагальнае. Яна абсталявана сіламі прадпрыемстваў і арганізацый. Шматлікія мерапрыемствы завершылі масавае выкананне Дзяржаўнага гімна Беларусі і салют.

Галіна Шпакоўская, «НС».