Требуется для просмотраFlash Player 9 или выше.

Статистика сайта

У віцебскім Летнім амфітэатры прайшоў гала-канцэрт рэспубліканскага фестывалю інвалідаў па зроку «Запалі сваю зорку». Удзельнічалі ў імлепшыя выканаўцы ГА «БелТІЗ» і зоркі беларускай эстрады.

Геаграфію Беларусі можна было вывучаць у гэты сонечны дзень толькі па нумарах аўтобусаў, што запоўнілі ўсе стаянкі вакол галоўнай сцэнічнай пляцоўкі Віцебшчыны: Гродна і Брэст, Бабруйск, Мінск і Гомель, не кажучы ўжо пра раёны нашай вобласці. І ўдзячныя гледачы не шкадавалі далоняў, каб выказаць сваё захапленне ўбачаным і пачутым.

У кулуарах сустрэў праслаўленага віцебскага лёгкаатлета, сярэбранага прызёра Алімпіяды-1988 у Сеуле Ігара Лапшына, які зараз з’яўляецца дырэктарам Цэнтра алімпійскай падрыхтоўкі «БелТІЗ». Ігар Алегавіч упэўнены, што падобнага фестывалю няма нідзе на постсавецкай прасторы. А старшыня грамадскага аб’яднання і адначасова прэзідэнт Паралімпійскага камітэта Рэспублікі Беларусь Алег Шэпель, дарэчы, ідэйны натхняльнік свята, вызначыў дзве асноўныя мэты мерапрыемства. Па-першае, гэта даніна павагі лю­дзям, «у якіх ёсць праблемы са зрокам, але няма праблем з душой, талентам, энтузіязмам». А па-другое, гэтай катэгорыі нашага грамадства не патрэбна шкадаванне, а патрэбны ўвага і падтрымка.
Між тым на сцэне задорны тэмп народнага ансамбля «Сваякі» віцебскага прадпрыемства «Элект» падтрымалі іншыя выканаўцы. У творчыя дуэты аб’ядналіся знаныя майстры сцэны (Ірына Дарафеева, Аляксей Хлястоў, Георгій Калдун, Улада, Іскуі Абалян, Ганна Шаркунова, салісты Белдзяржфілармоніі) і аматары з грамадскага аб’яднання. Прычым часам было нават цяжка зразумець, хто ў дуэце «прафесіянал – аматар» грае першую скрыпку. Упэўнены, што гукі апладысментаў удзячнай аўдыторыі надоўга захаваюцца ў душах творцаў, якія бачаць сэрцам.

Варта адзначыць, што сацыяльнымі партнёрамі праекта выступілі Белтэлерадыёкампанія, віцебскія аблвыканкам і гарвыканкам і мясцовыя структурныя падраздзяленні ГА «БелТІЗ».

Алесь Бынькоў, фота аўтара, «НС».