Требуется для просмотраFlash Player 9 или выше.

Статистика сайта

Кацярына Сібірцава – намеснік дырэктара цэнтра, а яшчэ і добры кераміст.

Ва ўтульнай мясцінцы ў засені велічных дрэваў размясціўся ў Наваполацку някідкі звонку будынак Цэнтра рамёстваў і традыцыйнай культуры.

Яго творцаў сустрэнеш на розных раённых і абласных святах, прадстаўлялі яны вобласць на рэспубліканскіх «Дажынках» 2009 года ў Кобрыне… У сёлетнім чэрвені ўдзельнічалі ў «Браслаўскіх зарніцах»… А трохі раней было свята Сярэднявечча «Меч Брачыслава» таксама ў гэтым райцэнтры. Выстава «Скарбніца майстэрства», што ладзілася гэтай зімой ў абласным метадычным цэнтры народнай творчасці, дала магчымасць атрымаць асалоду ад мастацкіх твораў (вышыванак, маляванак, керамічных вырабаў, вопраткі) навапалачан і жыхарам Віцебска. Яны сталі лаўрэатамі ў некалькіх намінацыях на свяце-конкурсе культурнай спадчыны ў імя этнографа Аляксандра Рыпінскага ў Лёзне.

Гонарам цэнтра з’яўляюцца яго творчыя калектывы. Усяго 16 розных фармаванняў. Папулярнасцю карыстаюцца работы, зробленыя ўдзельнікамі маладзёжнага фотаклуба «Граф-класік». Каля 30 апантаных чалавек займаюцца у ім «лоўляй імгненняў». Пра тое, што гэта сапраўды так, сведчаць шмалікія запрашэнні на розныя імпрэзы.
Першае месца з 17-і канкурэнтаў заняў летась на першым абласным конкурсе ў Дуброўне перасоўны тэатр лялек «Капялюш», які прадстаўляе традыцыйную беларускую батлейку. Ужо 6 батлеек зроблена рукамі гурткоўцаў, ёсць нават рэканструкцыя з XIX стагоддзя. Рэгулярна праводзяцца экскурсіі для школьнікаў, якім распавядаюць пра гісторыю тэатра, паказваюць пастаноўкі на біблейскую тэматыку.

А вось прадстаўнікі студыі візуальнай творчасці «NEXT» захапляюцца кінематографам, здымаюць свае пакуль яшчэ кароценькія фільмы. Наваполацк – малады горад, таму і сярэдні ўзрост тых, хто завітвае ў цэнтр, – 30-40 гадоў. Вось і ў народным калектыве архаічных спеваў «Княжыч» аўтэнтычным фальклорам займаюцца не бабулькі і дзядулькі, а маладыя дзяўчаты ад 16 да 30 гадоў. Яны ездзяць па вёсках у этнаграфічныя экспедыцыі разам з калегамі з «Граф-класіка», запісваюць песні каляндарна-абрадавага цыклу, у склад гуртка ўваходзяць і педагогі-гісторыкі з ПДУ.

Больш за 30 майстроў  і мастакоў вядуць рэй у народным клубе «Прамень». Тут яны займаюцца салома- і лозапляценнем, керамікай, вышыўкай і іншымі цікавымі рэчамі.

Багата ў Наваполацку і іншых талентаў і захапленняў, што аб’яднаны ў клубы вайсковай рэканструкцыі «Чорны Война» і імя Вацлава Ластоўскага. Яны напрыканцы чэрвеня пацешылі шматлікіх гледачоў на Дні Віцебска. Знаходзяць прыхільнікаў студыі па вырабе мяккай цацкі, шматковага шыцця… Ёсць і свае выставачная і актавая залы, дзе заўсёды рады гасцям з розных куткоў не толькі вобласці, але і з-за яе межаў.

Алесь Бынькоў, фота аўтара, «НС».