Требуется для просмотраFlash Player 9 или выше.

Статистика сайта

За апошнія месяцы ў Сенненскім раёне знойдзена некалькі каменных артэфактаў, якія сведчаць пра малавядомыя старонкі гісторыі краю.

У самім горадзе пры пракладцы газаправода знойдзены гранітныя крыж і дзве вялікія надмагільныя пліты. Краязнаўцы сцвярджаюць, што ў гэтым месцы былі старыя клады яшчэ часоў Рэчы Паспалітай. На крыжы надпіс па-польску, які ў перакладзе гучыць: «Блаславёныя памерлыя, хто памірае з Богам». На адной з пліт выразна чытаецца толькі канчатак надпісу «… 5 lat» (5 гадоў). Хто быў пахаваны пад гэтымі надмагіллямі, можна будзе сказаць пасля расшыфроўкі надпісу спецыялістамі.

А на мінулым тыдні інфармацыйныя агенцтвы абышла навіна: у Сенненскім раёне знойдзена гранітная пліта з выявамі двух шляхецкіх гербаў – «Даленга» і «Косцеш». Як рассказаў дырэктар мясцовага краязнаўчага музея Дзмітрый Стрыжнеў, на полі каля вёскі Вялікі Азярэцк пліта ляжала тыльным бокам даўно – перамясціць яе не маглі з-за вялікіх памераў (вага больш за паўтоны). І вось сёлета адзін з механізатараў сельгаспрадпрыемства «Ульянавічы» атрымаў заданне з дапамогай энерганасычанага трактара прыбраць камень. Перавярнуў яго і…

Па словах мясцовых жыхароў, калісьці на гэтым участку поля стаяў драўляны касцёл, пры ім – могілкі. Магчыма, пад плітой былі пахаваны муж і жонка – прадстаўнікі двух родаў. Ёсць і іншая версія: па тагачаснай шляхецкай традыцыі знакі з выявай родавага герба ставілі пры ўездзе ў маёнтак. Але чаму адразу два?

Да герба «Даленга» належалі больш за 50 родаў, да «Косцеша» – за 30. Цяпер даследчыкам трэба высветліць, хто гэта былі: Каменскіяальбо Буяльскія, Ясінскія альбо Вронскія, Несцяровічы ці Яворскія, Макавецкія ці Мянжынскія…

Зараз пліту перавезлі да сенненскага музея.

Сяргей Кавалеўскі, фота аўтара, «НС».