Требуется для просмотраFlash Player 9 или выше.

Статистика сайта

Гэты дом памятае Купалу.

У філіяле Літаратурнага музея Янкі Купалы – запаведніку  «Ляўкі» Аршанскага раёна – распрацаваны змястоўны план мерапрыемстваў Года кнігі. У маі, сумесна з Копысскай бібліятэкай, чакаецца прэзентацыя ляўкоўскага цыкла вершаў класіка. Чытаць іх будуць мясцовыя школьнікі, а супрацоўнікі філіяла і бібліятэкі – расказваць, як пісаліся гэтыя творы, што натхняла народнага паэта на дняпроўскім узбярэжжы.

 «Мы плённа супрацоўнічаем з Копысскай імя Янкі Купалы і Зубаўскай сярэднімі школамі Аршанскага раёна, – заўважае малодшы навуковы супрацоўнік філіяла Лілія Упенік. – Штогод 18 мая, у Міжнародны дзень музеяў, запрашаем у запаведнік вучняў з настаўнікамі. Ля помніка Песняру гучаць вершы, песні». Загадчыца філіяла Тамара Крына распавядае пра бытнасць у Ляўках Купалы, іншых беларускіх класікаў, якія прыязджалі сюды пагасціць,  а таксама гісторыю стварэння тутэйшай музейнай экспазіцыі. Будзе такое мерапрыемства ў маі і сёлета. А ў верасні ў абедзвюх школах мяркуецца правесці сустрэчы пад назвай «Чытаем Янку Купалу». Лілію Упенік запрашаюць выступіць і ў школах райцэнтра. Дзеці пасля яе расповеду ўспрымаюць Купалу амаль ці не сваім земляком.

З вялікай цікавасцю слухаюць удзельнікі мерапрыемстваў, прысвечаных жыццю і творчасці Янкі Купалы, і ўспаміны мясцовых жыхароў. Пра вялікага беларускага паэта можа, напрыклад, расказаць колішняя настаўніца Копысскай СШ, зараз пенсіянерка Вольга Сяргееўна Марозава, якая сустракалася з ім у маленстве.
Сумеснымі намаганнямі абласнога аддзялення Саюза пісьменнікаў Беларусі, аддзела культуры Аршанскага райвыканкама, раённай бібліятэкі ў ліпені ў Ляўках павінна адбыцца чарговае абласное свята паэзіі. Яно становіцца традыцыяй і сёлета будзе прысвечана 130-годдзю з дня нараджэння Янкі Купалы і Якуба Коласа.

Самыя актыўныя наведвальнікі запаведніка «Ляўкі» – аршанцы і магіляўчане. Пасля экскурсіі па музейнаму збору зазвычай фатаграфуюцца ля помніка Купалу, даваеннага будынка былога лясніцтва, дзе напачатку спыняўся паэт, а зараз месціцца музейны філіял, і, канешне ж, узноўленага дачнага дамка. Можна зладзіць і тэматычную экскурсію, прысвечаную, напрыклад, аднаму з купалаўскіх твораў.

Зрэшты, кожны год у гэтым адметным куточку Віцебшчыны – Год кнігі, бо тут разгорнута несупынная праца па прапагандзе важкага ўнёску класіка ў прыгожае беларускае пісьменства.

Кніга ганаровых гасцей Літаратурнага музея Янкі Купалы, пачатая у 1982 г., да 100-годдзя з дня нараджэння Песняра, захоўваецца ў Мінску. Летась на год яна была перададзена ў Ляўкоўскі філіял. Прэзідэнт Беларусі Аляксандр Лукашэнка, наведаўшы запаведнік «Ляўкі» 14 мая 2011 г., зрабіў запіс у кнізе: «Дзякуй усім тым людзям, якія збераглі нам гэтую спадчыну».

Галіна Шпакоўская, «НС». Фота Антона Сцепанішчава, «НС».