Требуется для просмотраFlash Player 9 или выше.

Статистика сайта

У Свята-Успенскі кафедральны сабор абласнога цэнтра прывезена ікона з часцінкамі мошчаў свяціцеля Феадосія Чарнігаўскага цудатворцы. Епіскап Друцкі Пётр разам з духавенствам і праваслаўныя вернікі Віцебска сустрэлі святыню ў суботу, 21 ліпеня. Дождж, які пачаўся падчас унясення цудатворнай іконы ў сабор, не азмрочыў радасць віцяблян ад магчымасці ўшанаваць яшчэ аднаго ўгодніка Божага.

Хрысціяне кажуць: «Дзівосны Бог у святых Яго». Свяціцель Феадосій Чарнігаўскі праславіўся строгай справядлівасцю, міласэрнасцю, ісцінай хрысціянскай любоўю. За дапамогай і парадай да яго звярталіся не толькі праваслаўныя, але і вернікі іншых канфесій. Шмат людзей аздаравілася дзякуючы свяціцелю Феадосію Чарнігаўскаму. Усіх, хто звяртаўся да яго з верай і малітвай, ён умацоўваў цялесна і духоўна.

Традыцыйна падчас сустрэчы святыні быў адслужаны малебен, пасля якога епіскап Друцкі Пётр, вікарый Віцебскай епархіі, звярнуўся да вернікаў з пропаведдзю. «Менавіта святыя з’яўляюцца для нас прыкладам богаўгоднага жыцця, вось чаму мы павінны ўшаноўваць іх. Ікона свяціцеля Феадосія Чарнігаўскага цудатворцы прывезена ў самы прыгожы храм Віцебска, які пабудаваны не для мастацтва ў яго разуменні, а для мастацтва нашага жыцця і душы, якое дасягаецца праз малітву. Няхай кожнаму чалавеку будзе падораны цуд па веры ягонай. Галоўны ж цуд – наша з’яўленне на свет, наша жыццё».

Кожнаму, хто падыходзіў да цудатворнай іконы, быў уручаны лісток з жыціем свяціцеля Феадосія Чарнігаўскага і малітвай да яго. Святыня будзе знаходзіцца ў Свята-Успенскім кафедральным саборы Віцебска да 4 жніўня.

Ірына Лобан, фота аўтара, «НС».