Требуется для просмотраFlash Player 9 или выше.

Статистика сайта

Традыцыйна напярэдадні калядных святаў у курыі віцебскага каталіцкага біскупа Уладзіслава Бліна зладзілі прэс-канферэнцыю для журналістаў мясцовых СМІ.

Як заўсёды, сустрэча прайшла ў цёплай хатняй атмасферы. Усмешкі прысутных выклікаў расповед біскупа пра паездку ў Польшчу, дзе да спавядальняў стаяць вялікія чэргі дзівакоў, што вераць у заўтрашні «канец свету». Такім чынам яны «ачышчаюць сумленне».

Пробашч парафіі ў Бягомлі Віктар Місевіч нагадаў прысутным пра традыцыі светлага чакання Нараджэння Збаўцы. Перыяд Адвэнту павінен суправаджацца не толькі рэгулярным наведваннем касцёла, але і асаблівай увагай да блізкіх, якім трэба даць усё самае лепшае: сваю дабрыню, радасць, сяброўскую дапамогу. Сакраментальна гэта выражаецца ў падзеле аплаткі падчас начной пастэркі напярэдадні Божага Нараджэння. Ксёндз Віктар прэзентаваў чарговы нумар газеты «Каталіцкі веснік», галоўным рэдактарам якой з’яўляецца. Нядаўна створаны яе сайт у інтэрнэце, разлічаны пераважна на маладзёжную аўдыторыю.

Пазнаёміліся журналісты і з дзейнасцю далікатнай установы з нязвыклай назвай «касцёльны суд». Ён разглядае пераважна справы сямейных пар, якія просяць прызнаць несапраўдным сакрамант шлюбу (разводаў каталіцкі касцёл не прызнае). У любым выпадку канчатковае слова застаецца за «судом другой інстанцыі» ў Мінску. Радуе, што пакуль звярнуліся толькі 10 пар, што істотна менш, чым у заходнееўрапейскіх краінах.

У час Адвэнту прынята займацца дабрачыннасцю. Арганізуюцца наведванні дамоў-інтэрнатаў, нямоглых і пакінутых асобаў. Больш падрабязна пра гэта распавёў дырэктар каталіцкай дабрачыннай арганізацыі «Карытас» Віталь Кульпекша.

Цікавіла прэсу і адкрыццё новых касцёлаў: за 13 гадоў існавання Віцебскай дыяцэзіі быў асвечаны 21 храм. У бліжэйшы час адбудзецца асвячэнне храмаў у Дуброўне і на вуліцы Чкалава абласнога цэнтра.
Сваю карціну з выявай катэдральнага касцёла Езуса Міласэрнага падараваў дыяцэзіі вядомы мастак Фелікс Гумен, заснавальнік віцебскай школы акварэлі. Біскуп Уладзіслаў паабяцаў, што яна зойме цэнтральнае месца ў будынку курыі.

Усе былі запрошаны на святочныя богаслужэнні, а таксама дабрачынны канцэрт майстроў абласной філармоніі «Слухай сэрцам», які пройдзе 6 студзеня ў віцебскім касцёле Святой Барбары.

Алесь Бынькоў, фота аўтара, «НС».